پاکستان کے صوبہ بلوچستان کے ضلع خاران اور اسکے گرد و نواح میں آج صبح زلزلے کے جھٹکے محسوس کئے گئے۔ زلزلے سے علاقہ مکینوں میں خوف و ہراس پھیل گیا۔
صوبہ بلوچستان کے ضلع خاران اور اسکے گردونواح میں آج صبح 11 بجے قریب زلزلہ آیا۔ خوف کے سبب لوگ کلمہ طیبہ کا ورد کرتے ہوئے گھروں سے باہر نکل آئے۔
زلزلہ پیما مرکز کے مطابق ریکٹر اسکیل پر زلزلے کی شدت 3.2 ریکارڈ کی گئی جبکہ اسکی زیرزمین گہرائی 10 کلومیٹر تھی۔
زلزلہ پیما مرکز کے مطابق بلوچستان میں آنے والا زلزلہ زیادہ شدید نوعیت کا نہیں تھا اور اسکا مرکز خاران سے 29 کلومیٹر جنوب مغرب میں تھا۔ زلزلے سے کوئی جانی یا مالی نقصان کی اطلاع موصول نہیں ہوئی۔
واضح رہے کہ چند روز قبل بھی پاکستان کے صوبے بلوچستان کے ضلع ژوب اور گردونواح میں زلزلے کے جھٹکے محسوس کیے گئے تھے۔
گزشتہ چند ہفتوں سے دنیا کے مختلف مقامات پر زلزلے کے جھٹکے محسوس کئے جارہے ہیں اور عالمی ادارے اسکی بڑی وجہ سے موسمیاتی تبدیلیوں کو قرار دے رہے ہیں۔
دو ہفتے قبل شام اور ترکی میں آنے والے ہولناک زلزلے نے شدید تباہی مچائی۔ زلزلے میں اب تک 42 ہزار سے زائد افراد کی ہلاکت ہوچکی ہے جبکہ امدادی کاروائیاں اب بھی جاری ہیں۔
