کراچی کے علاقے صدر میں چینی ڈاکٹر کے قتل میں ملوث ملزم گرفتار

کراچی کے علاقے صدر میں 28 ستمبر کو ڈینٹل کلینگ پر فائرنگ کرنے اور چینی ڈاکٹر کو قتل کرنے میں ملوث اہم ملزم کو سیکیورٹی اداروں نے گرفتار کرلیا۔ میڈیا رپورٹس کے مطابق گرفتار ملزم کا تعلق کالعدم تنظیم سے ہے۔

سیکیورٹی اداروں نے انٹیلجنس کی بنیاد پر کاروائی کرتے ہوئے ملزم کو گرفتار کیا اور اسکے پاس سے واقعے میں استعمال ہونے والا اسلحہ بھی برآمد ہوا ہے۔

میڈیا رپورٹس کے مطابق واردات انجام دینے کے بعد ملزم ملیر قائد آباد میں روپوش ہوگیا تھا۔ مبینہ طور پر کا تعلق کالعدم تنظیم سے ہے اور اسے دہشتگردی کا ٹاسک ایس آر اے کی کمانڈ کی جانب سے دیا گیا تھا۔

واضح رہے کہ صدر میں واقع ڈینٹل کلینک میں پیش آنے والے فائرنگ کے واقعے میں 1 شخص جاں بحق اور خاتون سمیت 2 افراد زخمی ہوئے تھے۔ تینوں شخص چینی نژاد پاکستانی تھے۔

ملزم واردات انجام دینے کے بعد پیدل بھاگتا ہوا جہانگیر پارک کے دروازے کے قریب موجود موٹر سائیکل سوار ساتھی کے پاس پہنچا تھا اور دونوں باآسانی فرار ہو گئے تھے۔

ایف آئی آر میں درج زخمیوں کے ابتدائی بیان کے مطابق کلینک پر ڈاکٹر رچرڈ ، ان کی زوجہ اورکیشئیرا پنے کام میں مصروف تھے کہ ایک گاہک ( قد تقریباً 5فٹ7انچ) نیلی پینٹ ، کالی شرٹ اور لال ٹوپی پہنے کلینک میں داخل ہوا، جس نے ویٹنگ ایریا میں بیٹھ کربتایا کہ دانتوں کی صفائی کروانی ہے۔

تقریبا 5 سے 6 منٹ کے اندروہ ویٹنگ لاؤنج سے ڈاکٹرز کے کیبن کی جانب بڑھا اور اسلحہ نکال کرکلینک میں موجود تمام افراد پرفائرنگ شروع کردی۔ واقعے میں رونلڈ رائمنڈ چاؤ موقع پرہلاک اورڈاکٹر رچرڈ اوران کی اہلیہ شدید زخمی ہوئے۔

فائرنگ کے بعد ملزم باہر کی جانب بھاگا جبکہ کلینک کے باہر ملزم کا دوسرا ساتھی موٹرسائیکل پرموجود تھا، جس پر بیٹھ کردونوں موقع سے فرار ہوگئے۔