حکومت سندھ نے شہرقائد میں کٹی پہاڑی کے مقام پر پولیس اسٹیشن قائم کرنے کا فیصلہ کیا ہے۔ پولیس اسٹیشن کے قیام کا مقصد سیکیورٹی انتظامات کو مزید بہتر بنانا ہے۔
میڈیا رپورٹس کے مطابق ایڈیشنل انسپکٹر جنرل آف پولیس (ایڈیشنل آئی جی پی) ریسرچ اینڈ ڈویلپمنٹ سندھ مظفر علی شیخ نے ایڈیشنل آئی جی پی کراچی جاوید عالم اوڈھو کو خط لکھا ہے اور نئے تھانے کے قیام کے لیے تفصلات طلب کی ہیں۔
ایڈیشنل آئی جی پی کراچی سے نئے تھانے کا نام، سالانہ اوسطا جرائم کی شرح، جرائم کی نوعیت، تھانہ حدود میں رہائش پذیر افراد کی تعداد، درکار پولیس موبائلز، درکار پولیس نفری، موجودہ زیر انتظام تھانے کی سالانہ جرائم کی تفصیلات، تھانہ کے قیام کے لیے درکار وسائل، عمارت کی تعمیر کے لیے زمین کا حصول اور مجوزہ نقشہ کی تفصیلات مانگی گئی ہیں۔
اس وقت کٹی پہاڑی کا علاقہ تھانہ شارع نور جہاں کے زیر انتظام ہے۔ کٹی پہاڑی شہر قائد کے اورنگی ٹاون، ضلع غربی میں واقع ہے۔
سماء نیوز کے مطابق ویسٹ زون کے ڈپٹی انسپکٹر جنرل آف پولیس فدا حسین مستوئی کا کہنا ہے کہ کٹی پہاڑی میں تھانے کے قیام کا مقصد اورنگی ٹاون ڈویژن میں سیکیورٹی انتظامات کو بہتر بنانا ہے۔
کٹی پہاڑی کا علاقہ تھانہ شارع نورجہان اور تھانہ پیرآباد کے بارڈر پر واقع ہے اور یہ بات مشاہدے میں آئی ہے کہ ملزمان جرم کرنے کے بعد دوسرے تھانے کی حدود میں باآسانی داخل ہو جاتے تھے جس کی وجہ سے ان کے خلاف کاروائی میں تاخیر ہو جاتی تھی۔
فدا حسین مستوئی کے مطابق کٹی پہاڑی میں تھانے کے قیام کے بعد ملزمان کا ایک تھانے سے دوسرے تھانے کی حدود میں منتقلی کا مسئلہ کسی حد تک کم ہو جائے گا۔ انہوں نے کہا کہ ماضی میں کٹی پہاڑی کا علاقہ نو گو ایریا رہا ہے جس کی وجہ یہاں پر موجود جرائم پیشہ افراد ہیں۔
انہوں نے امید ظاہر کی ہے کہ تھانے کے قیام کے بعد اس علاقے میں موجود جرائم پیشہ افراد کی سرگرمیوں پر نظر رکھنے میں مدد ملے گی۔ اسی طرح انتظامی بنیادوں پر ضلع غربی میں واقع گلشن معمار اور سرجانی ٹاون تھانوں کے پاس بھی بڑا رقبہ ہے اور مستقبل میں ان دو تھانوں کو بھی انتظامی بنیادوں پر تقسیم کرنے کا ارادہ ہے۔
