ڈرگ ریگولیٹری اتھارٹی (ڈریپ) نے کراچی میڈیسن مارکیٹ میں چھاپہ مار کر گودام میں ذخیرہ کی گئی ڈھائی لاکھ سے زائد پیناڈول کی گولیاں برآمد کرلیں۔
میڈیا رپورٹس کے مطابق ترجمان وزارت صحت کی جانب سے بیان میں کہا گیا ہے کہ مارکیٹ میں پیناڈول کی قلت کی خبروں کے بعد ڈریپ نے کاروائی کی۔
ترجمان کا کہنا تھا کہ ڈریپ نے کچی گلی میڈیسن مارکیٹ کراچی میں چھاپہ مارا اور کارروائی کے دوران 2 لاکھ 52 ہزار پیناڈول کی گولیاں برآمد کیں۔
وزارت صحت نے کہا ہے کہ ذخیرہ اندوزی سے مارکیٹ میں پیناڈول کی مصنوعی قلت پیدا کی گئی، فارمیسی سے ادویات کا مشکوک اسٹاک بھی برآمد ہوا۔
ڈریپ نے کچی گلی فارمیسی سے اسٹاک قبضے میں لے لیا اور برآمد ادویات کے نمونے ٹیسٹ کیلئے بھجوا دیئے ہیں۔ واضح رہے ڈریپ کا جعلی، غیر قانونی ادویات کا دھندہ کرنے والوں کے خلاف ملک گیر کریک ڈاون جاری ہے۔
ڈریپ نے اسلام آباد،لاہور اور پشاور میں بھی مختلف مقامات پرچھاپے مارے اور کارروائی میں ساڑھے 3 کروڑ مالیت کی غیر رجسٹرڈ ادویات برآمد کرلیں۔ ڈریپ نے اسلام آباد، پشاور اور لاہور میں غیر رجسٹرڈ ادویات بیچنے والے 25 اسٹورز، فارمیسز سیل کردیے۔
