-
-
ایف آئی اے منی لانڈرنگ کے مقدمے میں بڑی پیش رفت سامنے آئی ہے، اسپیشل سینٹرل عدالت نے وزیراعظم شہباز شریف کے بیٹے سلیمان شہباز اور ملزم طاہر نقوی کو اشتہاری قرار دے دیا ہے اور دونوں ملزمان کی جائیدادوں کی تفصیلات طلب کرلی ہیں۔
ایف آئی اے منی لانڈرنگ کے مقدمے کی سماعت اسپیشل کورٹ سینٹرل کے جج اعجاز اعوان نے کی۔ وزیر اعظم شہباز شریف سرکاری مصروفیت کے باعث عدالت میں پیش نہیں ہوئے۔
عدالت نے شہباز شریف کی ایک روز کی حاضری معافی کی درخواست منظور کر لی جبکہ وزیر اعلی پنجاب حمزہ شہباز سمیت دیگر ملزمان عدالت میں پیش ہوئے۔
اسپیشل کورٹ نے عدم پیشی پر شہبازشریف کے صاحبزادے ملزم سلیمان شہباز اور طاہر نقوی کو اشتہاری قرار دے دیا اور دونوں ملزمان کی جائیدادوں کی تفصیلات طلب کرلیں۔ دونوں ملزمان عدالت طلبی کے باوجود پیش نہیں ہورہے تھے۔
عدالت نے شریک ملزم ملک مقصود کی ڈیتھ سرٹیفکیٹ کی تفصیل بھی مانگ لی۔ عدالت نے شہباز شریف سمیت دیگر کے خلاف سماعت 30 جولائی تک ملتوی کردی اور آئندہ سماعت پر وزیر اعظم شہباز شریف کو پیش ہونے کی ہدایت کردی۔
عدالت نے تفتیشی افسر کو تاخیر سے پیش ہونے پر شوکاز نوٹس بھی جاری کردیا اور آئندہ وضاحت طلب کرلی۔
