-
-
کراچی میں سال نو کی خوشی میں ہوائی فائرنگ سے کئی گھروں میں خوشیاں غم میں بدل دیں۔سال نو کے موقع پر شہر قائد کے مختلف علاقوں میں ہونے والی ہوائی فائرنگ کے نتیجے میں خواتین اور بچوں سمیت 22 سے زائد افراد زخمی ہوگئے۔
کراچی میں فائرنگ کے واقعات صدر سن پیٹرک اسکول، گارڈن عثمان آباد، لائٹ ہاؤس، سول اسپتال راجہ میشن، حسین آباد، ناظم آباد بورڈ آفس، ناظم آباد پل، لیاقت آباد، فائیواسٹار چورنگی کے مقام پر پیش آئے۔
کھارادر، کشمیر کالونی، دھوراجی چورنگی، ایکسپو سینٹر، الاصف اسکوائر، آئی سی آئی سومرو گلی، لانڈھی فیوچر کالونی، ناگن چورنگی، قصبہ کٹی پہاڑی، واٹر پمپ، ایف بی ایریا، جمشید کوارٹر اور برنس روڈ پر بھی ہوائی فائرنگ کے واقعات رپورٹ ہوئے۔
نئے سال کے موقع پر ہوائی فائرنگ کے واقعات میں زخمی ہونے والے 8 افراد کو سول اسپتال، 4 کو جناح جبکہ 10 افراد کو طبی امداد کیلئے عباسی شہید اسپتال منتقل کیا گیا ہے۔
کراچی پولیس نے سال نو کے موقعے پر ہوائی فائرنگ کے واقعات میں ملوث ملزمان کے خلاف کارروائی کرتے ہوئے دو پولیس اہلکاروں سمیت 17 ملزمان کو گرفتار کر لیا۔
ایس پی گلشن ڈویژن سلیم شاہ کے مطابق گلشن پولیس نے کارروائی کرتے ہوئے ہوائی فائرنگ میں ملوث 3 ملزمان کو گرفتار کر لیا۔ 2 ملزمان کو گلشن اقبال جبکہ ایک کو شارع فیصل سے گرفتار کیا گیا ہے۔
ایس ایس پی سٹی کا کہنا ہے کہ سٹی ڈسٹرکٹ میں فائرنگ کرنے والے د2 پولیس اہلکاروں کو بھی گرفتار کیا گیا ہے۔ پولیس کی جانب سے اب تک ہوائی فائرنگ کے واقعات میں ملوث 17 ملزمان کو گرفتار کیا گیا ہے،
پولیس کارروائیوں کے دوران سٹی ڈسٹرکٹ سے 11، ڈسٹرکٹ ایسٹ سے 3 جبکہ ڈسٹرکٹ کورنگی سے بھی 3 ملزمان کو گرفتار کیا گیا۔
