-
-
پاکستان کے سب سے بڑے شہر کراچی میں چند دنوں سے وقفے وقفے سے بارشوں کا سلسلہ جاری ہے۔ شہر میں آج سے نئے سسٹم کے تحت موسلادھار بارشوں کا امکان ہے۔
محکمہ موسمیات کے مطابق کراچی میں اس وقت موسم ابر آلود اور انتہائی خوشگوار ہے۔ خلیج بنگال میں بننے والے ہوا کے کم دباؤ کے اثرات شہر پر پہنچنا شروع ہوگئے ہیں۔ شہر کے مضافاتی علاقوں میں بارش کا سلسلہ شروع ہوچکا ہے۔
گلشن معمار، سرجانی ٹاؤن، نارتھ کراچی اور اس سے ملحقہ علاقوں میں بارش کا سلسلہ جاری ہے جو وقت گزرنے کے ساتھ ساتھ شہر کے دوسرے علاقوں تک بھی پھیل جائے گا۔
محکمہ موسمیات کے مطابق شہرقائد میں آج سے 18 اگست تک وقفے وقفے سے کبھی تیز تو کبھی ہلکی بارش کا سلسلہ جاری رہے گا۔ بارش برسانے والا یہ سسٹم کل عروج پر ہوگا جسکے نتیجے میں موسلادھار بارشیں ہوسکتی ہیں۔
محکمہ موسمیات کی پیشگوئی کے مطابق تیز بارشوں کے نتیجے میں نشیبی علاقوں میں سیلابی صورتحال پیدا ہونے کا بھی خدشہ ہے۔ محکمہ موسمیات نے متعلقہ اداروں کو تیاری مکمل رکھنے الرٹ جاری کیا ہے۔
مون سون کے اس نئے سسٹم کے تحت کراچی سمیت بدین ، ٹھٹہ اور سندھ کے دیگر شہروں میں تیز بارشوں کی پیشگوئی کی گئی ہے۔
