-
-
سندھ میں مون سون کی ممکنہ بارشوں کے معاملے پر وزیر اعلیٰ سندھ سید مراد علی شاہ نے صوبے بھر میں رین ایمرجنسی نافذ کردی۔ وزیر اعلی ہاؤس سے رین ایمرجنسی ڈیوٹیز کا نوٹیفکیشن بھی جاری کردیا گیا ہے۔
وزیراعلی ہاؤس سے جاری کئے گئے اعلامئے کے مطابق مراد علی شاہ کی ہدایت پر وزراء، مشیروں اور معاون خصوصی کی خصوصی ڈیوٹیز لگا دی گئی، وزراء معاون خصوصی ، مشیران متعین کردہ اضلاع میں فرائض دیں گے۔
کراچی کے ضلع جنوبی میں صوبائی وزیر مکیش چاولہ اور ضلع شرقی میں سعید غنی رین ایمرجنسی کی ڈیوٹی انجام دیں گے۔ ضلع کورنگی میں تیمور تالپور اور ضلع وسطی میں شہلا رضا کو ذمہ داریاں سونپی گئی ہیں۔
وزیر اعلیٰ سندھ نے ضلع ملیر میں ساجد جوکھیو، ضلع غربی میں معاون خصوصی وقار مہدی اور ضلع کیماڑی میں معاون خصوصی لیاقت آسکانی کی ڈیوٹیاں لگائی ہیں۔
صوبائی وزیر سردار شاہ میرپور خاص ڈویژن کے تمام اضلاع میں رین ایمرجنسی کی مانیٹرنگ کریں گے۔ ٹنڈو الہیار میں صوبائی وزیر ضیا عباس شاہ، ٹنڈو محمد خان میں معاون خصوصی قاسم نوید قمر، حیدر آباد میں صوبائی وزیر جام خان شورو کی رین ایمرجنسی ڈیوٹی سر انجام دیں گے۔
مٹیاری میں صوبائی وزیر مخدوم محبوب الزماں، دادو جامشورو میں مشیر فیاض بٹ شہید بینظیر آباد ڈویژن میں معاون خصوصی پارس ڈیرو کی رین ایمرجنسی ڈیوٹی لگا دی گئی۔
سکھر ڈویژن میں نواب وسان، اور لاڑکانہ ڈویژن کے تمام اضلاع میں صوبائی وزیر امتیاز شیخ رین ایمرجنسی کی مانیٹرنگ دیکھیں گے۔ صوبائی وزراء، مشیر اور معاون خصوصی رین ایمرجنسی سے متعلق تمام رپورٹس وزیر اعلیٰ سندھ کو دیں گے۔
