-
-
پاکستان تحریک انصاف نے کراچی میں قومی اسمبلی کے حلقہ این اے 237 ملیر میں پیپلز پارٹی کے امیدوار عبدالحکیم بلوچ کی کامیابی کو سندھ ہائی کورٹ میں چیلنج کردیا۔
پاکستان تحریک انصاف (پی ٹی آئی) سندھ کے صدر علی زیدی نے سندھ ہائی کورٹ میں عبدالحکیم بلوچ کی کامیابی کے خلاف درخواست دائر کی۔ درخواست ڈاکٹر شہاب امام ایڈوکیٹ کے توسط سے دائر کی گئی۔
پی ٹی آئی نے درخواست میں مؤقف اپنایا ہے کہ این اے 237 میں بدترین دھاندلی کی گئی، پیپلز پارٹی کے کارکنان نے جعلی ووٹ ڈالے۔
علی زیدی کی جانب سے دائر درخواست میں مزید کہا گیا ہے کہ حلقے میں دھاندلی سے متعلق الیکشن کمیشن کو شکایات بھی کیں، دھاندلی اور دیگر شکایات پر شفاف تحقیقات کا حکم دیا جائے۔
پاکستان تحریک انصاف (پی ٹی آئی) کی جانب سے سندھ ہائی کورٹ میں دائر کی گئی درخواست میں الیکشن کمیشن، سندھ حکومت اور حکیم بلوچ کو فریق بنایا گیا ہے۔
واضح رہے کہ این اے 237 ملیر میں ضمنی الیکشن کے دوران پاکستان تحریک انصاف کے چیئرمین عمران خان کو پاکستان پیپلز پارٹی (پی پی پی) کے رہنما عبدالحکیم بلوچ نے شکست دی تھی۔
