-
-
شہرقائد کے باسیوں پر ایک بار پھر بجلی بم گرانے کی تیاری کرلی گئی۔ فیول ایڈجسٹمنٹ کی مد میں کراچی کے شہریوں کیلئے بجلی مزید مہنگی کرنے کی منظوری دے دی گئی۔ نیپرا نے گزشتہ ماہ ہی اپریل کے بلوں میں 3 روپے 27 پیسے فی یونٹ وصولی کی منظوری بھی دی تھی۔
نیشنل الیکٹرک پاور ریگولیرٹی اتھارٹی (نیپرا) نے کراچی والوں کیلئے بجلی مزید مہنگی کرنے کی تیاری کرلی ہے۔ کےالیکٹرک کی فروری کے فیول چارجزایڈجسٹمنٹ کی مد میں فی یونٹ 3 روپے 45 پیسے بجلی مہنگی کرنے کی درخواست پر نیپرا میں سماعت ہوئی۔
سماعت میں حکام نے کہا کہ مختلف ایڈجسٹمنٹس کےبعد فروری ایڈجسٹمنٹ کا اضافہ 1روپے 28 پیسے بنےگا۔ دوسری جانب کراچی چیمبر آف کامرس کے نمائندے کا کہنا تھا کہ ابھی تو ہم پچھلے ماہ کی فیول ایڈجسٹمنٹ دے رہے ہیں اس لیے ہم فروری کی مجوزہ فیول چارجز ایڈجسٹمنٹ مسترد کرتے ہیں۔
تاہم نیپرا نے سماعت کے بعد مختلف ایڈجسٹمنٹس کے ذریعے فی یونٹ بجلی 1 روپے 28پیسے مہنگی کرنے پر فیصلہ محفوظ کرلیا ہے جسے بعد میں جاری کیا جائےگا۔
دوران سماعت چیئرمین نیپرا نے سوال کیا کہ کیا کے الیکٹرک کا سوئی سدرن سے گیس معاہدہ ہوا؟ کیا کے الیکٹرک کوئی اضافی بجلی لوڈ شیڈنگ تو نہیں کر رہی؟ جس پر کے الیکٹرک حکام نے جواب دیا نہیں ایسا نہیں صرف ایک دن میں آدھے گھنٹے تک کا مسئلہ بنا تھا۔
واضح رہے کہ اس سے قبل نیپرا نے کراچی کے صارفین سے جنوری کی فیول ایڈجسٹمنٹ کے ذریعے اپریل کے بلوں میں 3 روپے 27 پیسے فی یونٹ وصولی کی منظوری بھی دے رکھی ہے۔
