سیلاب متاثرین کیلئے پاکستان آنے والی اقوام متحدہ کے ادارہ برائے پناہ گزین (یو این ایچ سی آر) کی نمائندہ خصوصی اور ہالی وڈ اداکارہ انجیلینا جولی نے نیشنل فلڈ رسپانس کوآرڈی نیشن سینٹرکا دورہ کیا۔
ہالی ووڈ اداکارہ انجلینا جولی کا کہنا ہے کہ انہوں نے پاکستان میں سیلاب سے ہونے والی تباہی کبھی نہیں دیکھی، پاکستان کو بہت بڑی امداد کی ضرورت ہے۔
انجیلینا جولی کا کہنا تھا کہ پاکستان میں سیلاب سے جو تباہی ہوئی ہے دنیا کو اس کا اندازہ ہی نہیں، آئندہ ہفتوں میں بھرپور مدد نہ پہنچی تو زندہ بچنے والے بھی نہیں بچیں گے۔
زندگی وموت کی کشمکش میں مبتلا ان انسانوں میں بےشمار بچے بھی ہیں، میں نے ایسی تباہی اپنی زندگی میں پہلے کہیں نہیں دیکھی۔
انجلینا جولی نے کہا کہ متاثرین کو خوراک، شیلٹر اور طبی سہولتوں کی ہنگامی بنیادوں پر ضرورت ہے، پہلے جب بھی آئی پاکستانی عوام کو افغان عوام کی مہمان نوازی کرتے پایا۔
انجلیناجولی نے عالمی برادری سے پاکستان میں متاثرین کی مدد کیلئےڈومور کا مطالبہ کرتے ہوئے کہا کہ پاکستان میں سیلاب سے جو صورتحال ہے دنیا کو اس پر جاگنا چاہیے۔
ان کا کہنا تھا کہ آج پاکستانیوں کی بڑی تعداد خود بڑی قدرتی آفت کا شکار ہے، یہ بہت سارے لوگوں کی زندگی وموت کا مسئلہ ہے۔
ہالی ووڈ کی اداکارہ نے کہا کہ کلائمنٹ چینج کے کم ذمہ دار ممالک کو دوسروں کی نسبت زیادہ تباہی کا سامنا ہے، مصیبت کی اس گھڑی میں میرا دل پاکستانی عوام کے ساتھ ہے۔
انجلینا جولی مشکلات میں گھری عوام کی مدد میں دن رات مصروف پاک فوج سے متاثر ہوئی، ان کا کہنا تھا کہ کوئی بھی امدادی سرگرمی دیکھی تو دیکھا وہ پاک فوج کررہی ہے۔
انجلینا جولی نے کہا کہ ہرجگہ پاک فوج کو عوام کی مدد کرتے اور زندگیاں بچاتے دیکھا، جن زندگیوں کو بچایا گیا ان سے بات کی مگر وہ ابھی محفوظ نہیں۔
