-
-
میئر کراچی مرتضٰی وہاب نے شہرقائد میں عیدالاضحٰی پر آلائشیں جمع کرنے اور انہیں ٹھکانے کیلئے جامع منصوبہ بندی کی ہدایت کردی۔ مرتضٰی وہاب نے سندھ سالڈ ویسٹ مینجمنٹ بورڈ کے کمانڈ اینڈ کنٹرول روم کا دورہ کرکے تیاریوں کا جائزہ بھی لیا۔
مئیر کراچی مرتضی وہاب نے سندھ سالڈ ویسٹ مینجمنٹ بورڈ کے کمانڈ اینڈ کنٹرول کا دورہ کیا۔ ایم ڈی سالڈ ویسٹ سید امتیاز علی شاہ نے عیدالاضحی کے انتظامات اور مانیٹرنگ کے حوالے سے میئر کراچی کو تفصیلی بریفنگ دی۔
عیدالاضحٰی پر آلائشیں جمع کرنے کیلئے کراچی کے تمام اضلاع میں 91 کلیشن پوائنٹس بنائے جائیں گے۔ عید کے چاروں دن خصوصی آپریشن کیلئے 6 ہزار 802 گاڑیاں اور مجموعی طور پر 24 ہزار 366 لیبر ڈیوٹی پر مامور ہوگی۔
علاقوں سے آلائشیں جمع کرکے کلیکشن پوائنٹس اور پھر لینڈ فل سائٹ خندقوں میں منتقل کی جائیں گی۔ جانوروں کی آلائشوں کو محفوظ طریقے سے مدفون کرنے کیلئے لینڈ فل سائٹ جام چاکرو، گوند پاس اور جی ٹی ایس شرافی گوٹھ پر 18 خندقیں بنائی جائیں گی جسکے لئے کھدائی کا کام جاری ہے۔
مرتضی وہاب نے سندھ سالڈ ویسٹ مینجمنٹ بورڈ کو ہدایت کی کہ شہریوں کو شکایات کا موقع نہ دیا جائے عملہ ہر گلی محلوں سے آلائشیں اٹھانے کا کام بروقت انجام دیں۔ کلیکشن پوائنٹس اوردیگر مقامات پرچونے کا چھڑکاؤ اور اسپرے یقینی بنانے کی بھی ہدایت کی۔
ایم ڈی سالڈ ویسٹ نے مزید بتایا کہ شکایات کے بروقت ازالے کے لئے تمام اضلاع میں شکایتی مراکز بنا دئیے گئے ہیں جس کی تفصیلات سوشل میڈیا اور پرنٹ میڈیا کے ذریعے بھی شہریوں کو فراہم کی جائے گی۔ ہیلپ لائن نمبر1128 پر شفٹوں میں عملہ تعینات کیا جائے گا۔
