ایڈمنسٹریٹر کراچی، مشیر قانون اور ترجمان حکومت سندھ بیرسٹرمرتضیٰ وہاب نے کراچی کے علاقے کورنگی میں مختلف منصوبوں کا افتتاح کیا۔
ایڈمنسٹریٹر کراچی مرتضٰی وہاب نے فشر مین چورنگی سے یو ایم ڈی پی 16000 روڈ کی تعمیر اور دیگر منصوبوں کا سنگ بنیاد رکھ دیا ہے۔
اس موقع پر مرتضٰی وہاب کا کہنا تھا کہ پہاڑی گراؤنڈ میں فیملی پارک اور کرکٹ گراؤنڈ تعمیر کیا جائے گا، انٹرسیکشن 9000 روڈ سے پہاڑی گراؤنڈ کورنگی تک دو رویہ سڑک بھی تعمیر کی جائے گی۔
مرتضیٰ وہاب نے کہا کہ کورنگی میں متعدد منصوبے زیر تعمیر ہیں، فشر مین چورنگی سے یو ایم ڈی سی تک 2.1 کلومیٹر دو رویہ سڑک تعمیر کی جارہی ہے۔
انہوں نے کہا کہ سڑکوں کی تعمیر کے ساتھ ساتھ فٹ پاتھ، اسٹریٹ لائٹس، شجر کاری اور ڈسٹ بنز بھی لگائے جائیں گے اور پارکنگ کی جگہ بھی فراہم کی جارہی ہے، پارکوں کو ماڈرن ڈیزائن کے تحت تعمیر کیا جارہا ہے جس میں تمام ضروریات کا خیال رکھا جارہا ہے۔
ایڈمنسٹریٹر کراچی کا کہنا ہے کہ پیپلز پارٹی کی حکومت نظر انداز کئے گئے علاقوں کی ترقی کے لئے بھر پور کوشش کررہی ہے، گزشتہ ہفتے ابراہیم حیدری میں 4 ترقیاتی منصوبے شروع کئے گئے ہیں۔
مرتضیٰ وہاب نے کہا کہ کراچی میں ترقی کا سفر جاری ہے، ماضی میں کراچی کے بہت سے علاقوں کو ترقیاتی منصوبوں سے محروم رکھا گیا۔
انہوں نے مزید کہا کہ پیپلز پارٹی کے چیئرمین بلاول بھٹو زرداری کراچی کی یکساں ترقی کے خواہش مند ہیں، کراچی نیبر ہوڈ امپرومنٹ پروجیکٹ کے تحت کراچی کوترقی دینے کے لئے متعدد منصوبے زیر تعمیر ہیں۔
