پاکستان کرکٹ بورڈ (پی سی بی) نے نئی قومی سلیکشن کمیٹی کا اعلان کردیا، عاقب جاوید، اظہر علی اور علیم ڈار کو سلیکشن کمیٹی میں شامل کر لیا گیا
پی سی بی کے مطابق نئی قومی سلیکشن کمیٹی میں سابق بولنگ کوچ عاقب جاوید، سابق کپتان اظہر علی اور آئی سی سی کے سابق ایلیٹ امپائر علیم ڈار کو رکھا گیا ہے جبکہ اسد شفیق سلیکشن کمیٹی میں برقرار رہیں گے اور حسن چیمہ ڈیٹا اینالسٹ کے طور پر کام جاری رکھیں گے۔
دوسری جانب سابق کرکٹر سلیم یوسف کو 7ماہ بعد ہونے والے ہانگ کانگ سپر سکسز ٹورنامنٹ کے لیے ٹیم کا مینجر مقرر کیا گیا ہے۔ میڈیا رپورٹ کے مطابق قومی ٹیم کی ناقص کارکردگی اور سلیکٹر محمد یوسف کے مستعفی ہونے کی بنا پر نئی سلیکشن کمیٹی تشکیل دی گئی، جس کا اجلاس طلب کر لیا گیا۔
Members of the men’s national selection committee met at the NCA on Friday afternoon. They will travel to Multan on Saturday to meet the head curator, captain and head coach, after which they will finalise the squad for the second Test. pic.twitter.com/egoIOmDPWh
— Pakistan Cricket (@TheRealPCB) October 11, 2024
قومی سلیکشن کمیٹی انگلینڈ کے خلاف دوسرے ٹیسٹ میچ کے لیے ہیڈ کوچ اور کپتان سے مشاورت کے بعد قومی ٹیم کا انتخاب کرے گی، نئی سلیکشن کمیٹی نئے ٹیسٹ کپتان کے حوالے سے بھی اپنی سفارشات تیار کرکے چئیرمین پی سی بی محسن نقوی کو پیش کرے گی۔
واضح رہے کہ محمد یوسف نے 2 ہفتے قبل سلیکٹر کے عہدے سے استعفیٰ دیا تھا اور چیئرمین پی سی بی نے چند روز قبل سلیکشن کمیٹی ازسر نو تشکیل دینے کا اعلان کیا تھا۔ تاہم، گرین شرٹس کے دورہ آسٹریلیا کے لیے پاکستانی ٹیم کا اعلان نئی سلیکشن کمیٹی کرے گی۔
خیال رہے کہ اظہر علی، عاقب جاوید، مشتاق احمد، اور سلیم یوسف کے ساتھ ابتدائی مشاورت گزشتہ ہفتے ہوئی تھی، اس سے قبل عاقب جاوید نیشنل کرکٹ اکیڈمی (این سی اے) میں بھی فرائض نبھا چکے ہیں۔ تاہم، اسد شفیق بطور سلیکٹر کام جاری رکھیں گے۔
