-
-
کمشنر کراچی سیدحسن نقوی نے شہر کی 11 اہم شاہراؤں پر موٹرکیب رکشوں پر پابندی عائد کردی ہے۔ کمشنر کراچی نے ڈی آئی جی ٹریفک پیرمحمد شاہ کی سفارش پر 144 سی آر پی سی کے تحت یہ پابندی عائد کی ہے۔
کمشنر کراچی کے نوٹیفیکشن کے مطابق پابندی 2 ماہ کیلئے عائد کی گئی ہے جسکا آغاز 15 اپریل سے ہوگیا ہے 14 جون 2025 تک یہ پابندی نافذ رہے گی۔ پابندی کا مقصد ٹریفک کی روانی کو بحال رکھنا ہے۔
نوٹیفیکشن کے مطابق ون پلس ٹو اور ون پلس فور رکشے مختلف غیر مجاز اور خود ساختہ غیر قانونی روٹس پر چلتے ہیں اور انکے غیر قانونی اسٹینڈز بھی قائم ہیں جو ٹریفک کی روانی میں رکاوٹ کا باعث بنتے ہیں۔ کمشنر کراچی کی جانب سے پابندی سے متعلق تمام ایس ایچ اوز کو ہدایت جاری کردی گئی ہیں۔
مزید پڑھیں:کراچی میں چنگچی رکشوں کی بڑھتی تعداد اور ٹریفک مسائل
کراچی کی مصروف ترین شاہراہ شارع فیصل آواری لائٹ سگنل سے مادام اپارٹمنٹ اور آئی آئی چند ریگر روڈ ٹاور سے شاہین کمپلیکس تک ون پلس ٹو اور ون پلس فور ایم سی آر دونوں قسم کے رکشوں پر پابندی عائد ہوگی۔
شہر کی دیگر اہم شاہرائیں شارع قائدین نمائش سے شارع فیصل نرسری ، شیر شاہ سوری روڈ میٹرک بورڈ آفس سے ناگن چورنگی ، شہید ملت روڈ جیل چورنگی سے شہید ملت ایکسپریس وے ، عبداللہ ہارون روڈ 2 تلوار سے ہاشو سینٹر موبائل مارکیٹ تک ون پلس فور ایم سی آر رکشوں پر پابندی عائد ہوگی۔
اسی طرح ، 2 تلوار سے شارع فردوس عبداللہ شاہ غازی مزار ، اسٹیڈیم روڈ میلینئم مال سے تھانہ نیو ٹاؤن ، سر شاہ سلیمان روڈ سر حبیب ابراہیم رحمت اللہ روڈ سے حسن اسکوائر کار ساز تک ، راشد منہاس روڈ پر ڈرگ روڈ سے سہراب گوٹھ تک جبکہ ماڑی پور روڈ پر گلبائی سے آئی سی آئی پل تک بھی ون پلس فور رکشوں پر پابندی ہوگی۔
کمشنر کے نوٹیفکیشن کے مطابق خلاف ورزی کرنے والوں پر 188 پی پی سی کے تحت ایکشن ہوگا۔ ٹریفک پولیس کو شکایات درج کرانے اور کارروائی کا اختیار دے دیا گیا ہے، تمام ایس ایچ اوز کو پابندی کی خلاف ورزی پر سخت ایکشن لینے کی ہدایات جاری کردی گئی ہیں۔
کمشنر کراچی نے مزید کہا کہ ٹریفک کے بہاؤ کو بہتر اور حادثات سے بچاؤ کیلئے یہ فیصلہ کیا گیا ہے، رکشہ ڈرائیورز کو متبادل راستوں کا استعمال کرنے کی ہدایت کی گئی ہے۔
