کراچی میں وقفے وقفے سے تیز ہوائیں چلنے کا امکان، لاہور میں بارش سے گرمی کی شدت کمی

کراچی میں آج بھی موسم گرم اور مرطوب رہنے کا امکان ہے۔ محکمۂ موسمیات کے مطابق شہر میں وقفے وقفے سے تیز ہوائیں چلنے کا امکان بھی ہے۔

محکمۂ موسمیات نے بتایا کہ کراچی میں زیادہ سے زیادہ درجہ حرارت 37 ڈگری سینٹی گریڈ تک رہنے کا امکان ہے۔ محکمۂ موسمیات کے مطابق شہر میں کم سے کم درجہ حرارت 27.5 ڈگری سینٹی گریڈ ریکارڈ کیا گیا ہے۔ محکمۂ موسمیات نے یہ بھی بتایا کہ شہر میں ہوا میں نمی کا تناسب 72 فیصد ہے۔

دوسری جانب لاہور سمیت پنجاب کے کئی شہروں میں رات کو تیز آندھی اور بارش نے گرمی کی شدت کم کردی ہے، آندھی سے لیسکو ریجن میں درجنوں فیڈر ٹرپ کرگئے، تیز گرد آلود ہواؤں کے ساتھ پہلے ہلکی پھر گرج چمک کے ساتھ موسلادھار بارش ہوئی جس سے گردوغبار اور گرمی کی شدت کم ہوگئی۔

مزید پڑھیں:کراچی میں ہیٹ ویو کا سلسلہ ختم، آئندہ 2 روز موسم کیسا رہے گا؟ محکمہ موسمیات نے پیشگوئی کردی

محکمہ موسمیات کے مطابق لاہور ایئرپورٹ کےعلاقے میں آندھی کی رفتار 100کلو میٹر فی گھنٹہ رہکارڈ کی گئی۔ واسا کا کہنا ہے کہ سب سے زیادہ ایئر پورٹ پر 8 ملی میٹر بارش ریکارڈ کی گئی۔ محکمہ موسمیات کا کہنا ہے کہ قصور، پتوکی، کوٹ رادھا کشن، شیخوپورہ اور گرد ونواح میں تیز آندھی کے ساتھ بارش ہوئی، لیسکو ریجن میں متعدد جگہوں پر بجلی کے فیڈر ٹرپ کر گئے۔

لیکسو ترجمان کا کہنا ہے کہ ریجن بھر میں تیز ہوا اور بارش کا سلسلہ جاری ہے جبکہ 2169 فیڈرزمیں سے295فیڈرز پر سپلائی متاثر ہوئی ہے، بارش رکتے ہی بند ہونیوالے فیڈرز پر بحالی کا کام شروع کر دیا جائے گا۔ چیف ایگزیکٹو لیسکو نے تمام سرکل اور ڈویژن میں ہائی الرٹ جاری کر دیا ہے۔

Web Desk