-
-
امریکا نے بھارت پر زور دیا ہے کہ وہ کشیدگی کم کرنے اور جنوبی ایشیا میں امن اور سلامتی برقرار رکھنے کے لیے پاکستان کے ساتھ مل کر کام کرے۔ امریکی سیکریٹری خارجہ مارکو روبیو نے اپنے بھارتی ہم منصب جے شنکر سے رابطہ کرکے خطے کی کشیدہ صورتحال میں کمی لانے پر زور دیا ہے۔
امریکی محکمہ خارجہ کے بیان کے مطابق وزیر خارجہ مارکو روبیو نے بھارتی وزیر خارجہ سبرامنیم جے شنکر سے ٹیلی فون پر بات چیت کی، وزیر خارجہ نے پہلگام میں ہولناک دہشت گردانہ حملے میں جانی نقصان پر افسوس کا اظہار کیا۔
مارکو روبیو نے دہشتگردی کے خلاف بھارت کے ساتھ تعاون کے لیے امریکا کے عزم کا اعادہ کیا۔ امریکی وزیر خارجہ نے بھارت کی حوصلہ افزائی کی کہ وہ کشیدگی کو کم کرنے اور جنوبی ایشیا میں امن و سلامتی برقرار رکھنے کے لیے پاکستان کے ساتھ مل کر کام کرے۔
ترجمان امریکی محکمہ خارجہ ٹیمی بروس کے مطابق مارکو روبیو نے دہشت گردی کے خلاف جنگ میں پاکستان کی طرح بھارت کے ساتھ بھی تعاون کے لیے امریکی عزم کا اعادہ کیا۔
وزیر اعظم شہباز شریف سے امریکی وزیر خارجہ کا ٹیلی فونک رابطہ
اس سے قبل وزیر اعظم شہباز شریف اور امریکی وزیر خارجہ مارکو روبیو کے درمیان بھی ٹیلیفونک رابطہ ہوا جس میں وزیر اعظم نے مارکو روبیو کو جنوبی ایشیا میں حالیہ پیش رفت پر اپنے نقطہ نظر سے آگاہ کیا۔
وزیر اعظم نے دہشت گردی کے خلاف جنگ میں پاکستان کے اہم کردار کا ذکر کرتے ہوئے کہا کہ دہشت گردی کے خلاف عالمی جنگ میں پاکستان نے 90 ہزار سے زائد جانوں کی قربانی دی جبکہ پاکستان کو 152 ارب ڈالر سے زیادہ کا معاشی نقصان برداشت کرنا پڑا۔ مارکو روبیو نے جنوبی ایشیا میں امن کے لیے دونوں فریقوں کے مل کر کام جاری رکھنے کی ضرورت پر زور دیا۔
