-
-
وزیر بلدیات سندھ سعید غنی کی زیر صدارت سندھ بلڈنگ کنٹرول اتھارٹی (ایس بی سی اے) ڈسٹرکٹ ایسٹ کا اجلاس منعقد ہوا۔ انہوں نے کہا کہ جو بھی افسران غیر قانونی تعمیرات میں ملوث پائے گئے انہیں فوری معطل کردیا جائے گا
سندھ کے صوبائی وزیر بلدیات سعید غنی نے ہدایت جاری کی کہ سندھ حکومت کی جانب سے 27 مئی 2022 کو ڈپٹی کمیشنرز کی سربراہی میں نوٹیفائیڈ ہونے والی ڈیمالیشن کمیٹیوں کو فوری طور پر بحال کیا جائے۔
انہوں نے کہا کہ تمام فیلڈ اسٹاف و بلڈنگز انسپکٹرز ہر ماہ اپنی دستخط سے سرٹیفکیٹ جمع کروائیں گے، جس میں وہ اس بات کی تصدیق کریں گے کہ ان کے متعلقہ دائرہ اختیار میں کوئی غیر مجاز یا غیر قانونی تعمیر نہیں ہوئی ہے۔
سعید غنی کا کہنا تھاکہ کے الیکٹرک، واٹر بورڈ، ایس ایس جی سی سمیت تمام یوٹیلیٹی فراہم کرنے والے اداروں کو تحریری طور پر آگاہ کیا جائے کہ جس بھی بلڈنگز کے مکمل ہونے کی سرٹیفکیٹ نہ ہو اس کو یہ یوٹیلیٹی فراہم نہ کی جائیں۔
غیر قانونی تعمیراتی سرگرمیوں میں ملوث افراد یا فریقین کے خلاف بھی ایف آئی آر درج کی جائے۔ انہوں نے کہا کہ جو بھی بلڈنگز انسپکٹر، سنئیر بلڈنگز انسپکٹر یا ایڈیشنل ڈائریکٹر غیر قانونی تعمیرات میں ملوث پایا گیا اس کو فوری طور پر معطل کرکے ان کا تبادلہ سندھ کے دیگر اضلاع میں کردیا جائے گا۔
سعید غنی کا مزید کہنا تھا کہ ایس بی سی اے کے ویب پورٹل پر، عام لوگوں کو ان پلاٹوں کے حوالے سے آگاہی فراہم کی جائے، جہاں غیر قانونی تعمیرات ہو رہی ہیں۔
