پاکستان میٹرولوجیکل ڈیپارٹمنٹ (پی ایم ڈی) کے چیف میٹرولوجسٹ سردار سرفراز نے کہا ہے کہ کراچی میں رمضان کے آخری 10 دنوں کے دوران موسم گرم رہنے کا امکان ہے کیونکہ شہر میں 20 مارچ سے گرمی کی شدت میں اضافہ متوقع ہے۔
چیف میٹرولوجسٹ نے کہا کہ ماہ مقدس کے ابتدائی دنوں میں موسم نسبتاً خوشگوار رہنے کا امکان ہے۔ انہوں نے کہا کہ سمندری ہواؤں کی وجہ سے دن نسبتاً گرم اور راتیں بہتر ہوں گی۔ یاد رہے کہ محکمہ موسمیات نے کہا ہے کہ منگل اور بدھ کی راتوں میں سردی کی لہر میں معمولی اضافہ دیکھا جا سکتا ہے کیونکہ پارہ 10سے 12 ڈگری سینٹی گریڈ تک گر سکتا ہے۔
اس کے علاوہ محکمہ موسمیات نے اگلے 24 گھنٹوں کے لیے سرد اور خشک موسم کی پیشن گوئی کی ہے اور کم سے کم درجہ حرارت 13-11 ڈگری سینٹی گریڈ تک گر نے کا امکان ظاہر کیا ہے۔ شہر میں ہوائیں شمال سے 3 کلومیٹر کی رفتار سے چل رہی ہیں، جبکہ ہوا میں نمی کا تناسب 73 فیصد ریکارڈ کیا گیا ہے۔
دوسری جانب محکمہ موسمیات کا کہنا ہے کہ پشاور میں موسم سرد، خشک اور جزوی طور پر ابر آلود، خیبرپختونخوا کے میدانی اضلاع میں موسم سرد اور خشک رہے گا۔ محکمہ موسمیات کا کہنا ہے کہ بلوچستان کے شمالی اضلاع میں موسم انتہائی سرد ہے۔ محکمہ موسمیات نے کوئٹہ، زیارت، پشین، ژوب، قلات، مستونگ اور قلعہ عبداللہ میں تیز ہواؤں، ہلکی بارش اور برفباری کی پیش گوئی کی ہے۔ نوشکی، چاغی، گوادر، تربت اور پنجگور میں بھی ہلکی بارش کا امکان ہے۔
