کراچی کے علاقے ملیر میں کوہی گوٹھ میں نامعلوم مسلح ملزمان نے فائرنگ کرکے رینجرز اہلکاروں کو زخمی کردیا۔ ملزمان کی گرفتاری کیلئے چھاپے مارے جارہے ہیں۔
سینئر سپرنٹنڈنٹ پولیس ملیر عرفان علی بہادر کے مطابق واقعہ ملیر کے علاقے کوہی گوٹھ میں ندی کے قریب پیش آیا۔ ڈکیتی کی واردات کی اطلاع پر رینجرز اہلکار علاقے میں موجود تھے۔
ایس ایس پی ملیر عرفان بہادر کے مطابق رینجرز اہلکار ملیر میں چیکنگ کر رہے تھے کہ اس دوران انہوں نے موٹر سائیکل پر سوار 2 نوجوانوں کو رکنے کا اشارہ کیا جو رکنے کی بجائے فرار ہونے لگے۔
انہوں نے یہ بھی بتایا ہے کہ موٹر سائیکل پر سوار رینجرز کے اہلکاروں نے ان نوجوانوں کا تعاقب کیا تو ملزمان نے فائرنگ کر دی جس کے جواب میں رینجرز اہلکاروں نے بھی فائرنگ کی۔
ملزمان کی فائرنگ سے موٹر سائیکل سوار رینجرز کے دونوں اہلکار زخمی ہو گئے جبکہ ملزمان فرار ہونے میں کامیاب رہے۔ دونوں زخمی رینجرز اہلکاروں کو اسپتال روانہ کر دیا گیا ہے، جن میں سے 1 کی حالت تشویش ناک ہے۔
زخمی اہل کاروں کی شناخت رمضان اور شاہد کے ناموں سے کی گئی ہے۔ پولیس کا کہنا ہے واقعے سے متعلق تحقیقات جاری ہے۔ علاقے میں پولیس اور رینجرز کی اضافی نفری طلب کرلی گئی ہے۔ جب کہ ان کی گرفتاری کیلئے مختلف علاقوں میں چھاپے مارے جا رہے ہیں۔
