پاکستان سمیت دنیا بھر میں آج تعلیم کا عالمی دن منایا جا رہا ہے۔ اقوام متحدہ کے مطابق تعلیم ہر فرد کا بنیادی حق ہے اور پائیدار ترقی کے اہداف حاصل کرنے میں یہ کلیدی کردار ادا کرتی ہے۔ عوام کو مفت اور لازمی بنیادی تعلیم فراہم کرنا ریاست کا فرض ہے، لیکن ملک میں صورتحال انتہائی ابتر اور تشویشناک ہے۔
یونیسکو کی رپورٹ کے مطابق پاکستان میں اسکول نہ جانے والے بچوں کی تعداد دنیا میں دوسرے نمبر پر ہے۔ وفاقی وزارت تعلیم کے ذیلی ادارے کی جانب سے جاری رپورٹ کے مطابق ملک میں 16 سال کی عمر کے اسکول نہ جانے والے بچوں کی تعداد 2 کروڑ 66 لاکھ تک جا پہنچی ہے۔
پنجاب میں ایک کروڑ 11 لاکھ سے زائد بچے تعلیم سے محروم ہیں جبکہ سندھ میں 70 لاکھ سے زائد بچے اسکولوں سے باہر ہیں۔ خیبرپختونخوا میں 36 لاکھ اور بلوچستان میں 31 لاکھ سے زائد بچے تعلیم کے حصول میں ناکام جب کہ وفاقی دارالحکومت اسلام آباد میں بھی تقریباً 80 ہزار بچے اسکول نہیں جاتے ہیں۔ وزیر اعظم نے تعلیم کے عالمی دن کے حوالے سے اپنے پیغام میں کہا کہ ہمارے اسکولوں کو جدید ترین ٹیکنالوجی سے لیس ہونا چاہیے تاکہ ہمارے بچوں کو مستقبل کے لیے ضروری مہارتوں کے ساتھ تیار کیا جا سکے۔
