-
-
کراچی کے علاقے شاہ فیصل کالونی میں فیکٹری ورکرز سے بھری بس لوٹنے کے واقعے کے بعد ایس ایس پی کورنگی نے کئی پولیس اہلکاروں کے خلاف کارروائی کی ہے۔
جیو نیوز کے مطابق شاہ فیصل کالونی نمبر 3 میں عظیم پورہ روڈ پر ہوئی اجتماعی واردات کا مقدمہ درج کر لیا گیا ہے۔ ایف آئی آر وقوعہ کے 12 گھنٹے بعد مدعی محمد سلمان کی مدعیت میں درج کی گئی۔
ملزمان نے بس سوار فیکٹری ملازمین کے علاوہ آس پاس کے شہریوں سے بھی لوٹ مار کی تھی۔ پولیس حکام کے مطابق واردات کی جگہ سی سی ٹی وی کیمروں کی کوریج میں نہیں ہے تاہم اس سلسلے میں مزید تفتیش کی جا رہی ہے۔
جیو نیوز کی رپورٹ کے مطابق ایس ایس پی کورنگی نے کئی پولیس اہلکاروں کے خلاف بھی کارروائی کی گئی ہے۔ شاہ فیصل کالونی تھانے کے ہیڈ محرر وقار احمد کو ہٹا دیا گیا۔ انٹیلی جنس افسر فہیم اور اہلکار سعد کو بھی عہدے سے ہٹا کر کوارٹر گارڈ کر دیا گیا۔
شاہ فیصل کالونی تھانے کے نئے ایس ایچ او ثاقب خان چارج لینے کے بعد گھر چلے گئے تھے، ایس ایس پی نے نئے ایس ایچ او ثاقب خان کی سرزنش کی ہے۔ ایس ایس پی کورنگی حسن سردار نیازی نے جائے وقوع کا دورہ کیا اور پھر تھانے پہنچے۔
