-
-
کراچی میں مون سون کے چوتھے اسپیل کے زیر اثر ہونے والی موسلادھار بارشوں کے بعد ملیر ندی میں پانی کی سطح میں اضافہ ہوگیا ہے۔ مسلسل بارشوں کے باعث باعث ملیر ندی بپھر گئی۔
کورنگی کازوے پر پانی سڑکوں پر آگیا۔ اچانک آنے والے سیلابی ریلے میں کورنگی کازوے سے گزرنے والے 40 سے زائد افراد پانی میں ڈوب گئے۔
واقعہ گودام چورنگی سے بلوچ کالونی کی طرف جانے والے کازوے پر پیش آیا۔ انتظامیہ نے خبر ملتے ہی پانی کا بہاؤ تیز ہونے کے باعثٖ فوری طور پر کورنگی کازوے کو ٹریفک کیلئے بند کردیا گیا ہے۔
سیلابی ریلے میں پھنسے افراد کو ریسکیو کرنے کیلئے ایدھی کے رضاکاروں سمیت ، پولیس اور انتظامیہ کے دیگر افراد بھی پہنچ گئے۔
کازوے پر پھنسے ہوئے 15 سے زائد افراد کو ریسکیو کیا جاچکا ہے جبکہ دیگر افراد کو بھی پانی سے نکالنے کا عمل جاری ہے۔ شہریوں کو ایدھی رضاکار کشتیوں کے ذریعے ریسکیو کررہے ہیں۔
جبکہ انتظامیہ کی جانب سے بڑے ٹریکٹر کی مدد سے بھی موٹرسائیکل اور دیگر گاڑیوں میں پھنسے ہوئے افراد کو ریسکیو کیا جارہا ہے۔
