-
-
کراچی پولیس کو بدعنوان اہلکاروں سے پاک کرنے اور پولیس پر لوگوں کا اعتماد قائم کرنے کیلئے کراچی پولیس چیف غلام نبی میمن کی جانب سے مختلف اقدامات اٹھانے کا سلسلہ جاری ہے۔ ایڈیشنل آئی جی نے کرپٹ اہلکاروں کے خلاف کاروائی کیلئے بلیک کمپنی سیل قائم کردیا۔
ایڈیشنل آئی جی کراچی غلام نبی میمن نے پولیس کے اعلیٰ افسران کو متنبہ کیا ہے کہ جرم کی سرپرستی یا گٹھ جوڑ والے افسر کو کسی صورت نہیں بخشا جائے گا۔ روزنامہ جنگ کی رپورٹ کے مطابق ایڈیشنل آئی جی کراچی غلام نبی میمن نے ایس ایچ اومبینہ ٹاؤن فیض الحسن اور ایس ایچ او الفلاح کو معطل کرنے کے بعد تمام پولیس اہلکاروں کو یہ پیغام دیا ہے۔
رپورٹ کے مطابق کراچی پولیس میں کالی بھیڑوں کیلئے بلیک کمپنی کے نام سے سیل قائم کیا جاچکا ہے، جس میں جرائم کی سرپرستی کرنے اور علاقے میں جرائم کو روکنے میں ناکامی پر متعلقہ ایس ایچ او کو بلیک کمپنی میں ڈال دیا جاتا ہے۔
ایڈیشنل آئی جی کراچی نے رات گئے ایکشن لیا اور ایس ایچ او مبینہ ٹاون فیض الحسن اور ایس ایچ او الفلاح معطل کیا، غلام نبی میمن نے بتایا ہے کہ دونوں ایس ایچ اوزکیخلاف خفیہ انکوائری جاری تھی۔
