-
-
چین میں پائے جانے والے کورونا وائرس کے نئے ایکس بی بی ویرینٹ کی پاکستان میں تصدیق ہوگئی۔ حکام اور ماہرین کے مطابق پاکستان کو نئے ویرینٹس سے کوئی بڑا خطرہ نہیں، یہاں قوتِ مدافعت بہت بہتر ہے۔
قومی ادارہ برائے صحت اور آغاخان یونیورسٹی کے ماہرین نے ایکس بی بی ویرینٹ کی تصدیق کی ہے۔ این آئی ایچ اور آغا خان یونیورسٹی حکام کے مطابق جینوم سیکونسنگ سے ایکس بی بی ویرینٹ کی تصدیق کی گئی، تاہم ابھی تک پاکستان میں بی ایف 7 ویرینٹ کی تصدیق نہیں ہوئی ہے۔
آغا خان یونیورسٹی کے ماہر ڈاکٹر فیصل محمود نے بھی تصدیق کرتے ہوئے کہا ہے کہ مجھے بھی 100 فیصد یقین ہے کہ دونوں ویرینٹس پاکستان آچکے ہیں۔ حکام اور ماہرین کے مطابق پاکستان کو دونوں نئے ویرینٹس سے کوئی بڑا خطرہ نہیں، یہاں قوتِ مدافعت بہت بہتر ہے۔
این آئی ایچ حکام کے مطابق پاکستان میں آج کورونا وائرس کے 15 کیسز سامنے آئے ہیں، جبکہ مثبت کیسز کی شرح صرف اعشاریہ 40 فیصد ریکارڈ کی گئی ہے۔ ماہرین صحت کے مطابق پاکستان میں کورونا وائرس سے چین جیسے حالات پیدا ہونے کا قطعاً کوئی امکان نہیں ہے۔
