-
-
دنیائے فٹبال کا حکمران کون ہوگا اس کا فیصلہ آج ہونے والے فرانس اور ارجنٹائن کے فائنل میں ہوگا۔ قطر میں فٹبال ورلڈکپ 2022 کا فائنل آج دفاعی چیمپئن فرانس اور ارجنٹینا کے درمیان کھیلا جائے گا۔
قطر میں جاری فیفا ورلڈکپ میں 32 ٹیموں میں شرکت کی اور شائقین فٹبال کو سنسنی خیز میچز دیکھنے کو ملے اب فیصلے کی گھڑی آن پہنچی ہے۔ آج فائنل معرکے میں اپنا آخری میچ کھیلنے والے ارجنٹینا کے میسی میدان میں اتریں گے اور ورلڈ کپ جیتنے کا خواب پورا کرنے کی کوشش کریں گے۔
دوسری جانب فرانسیسی کھلاڑی بھی اعزاز کا دفاع کرنے کے لیے بے تاب دکھائی دیں گے۔ دونوں فائنلسٹ ٹیموں میں اسٹار کھلاڑی موجود ہیں، کیلیان ایمباپے اور لیونل میسی، دونوں پلیئرز ورلڈکپ میں اب تک پانچ پانچ گول کرچکے ہیں۔
سات مرتبہ کے بیلن ڈی اور ایوارڈ جیتنے والے لیونل میسی صرف ایک بڑا ٹائٹل ہی ارجنٹینا کو جتوانے میں کامیاب ہوئے، میسی کے پاس ارجنٹینا کو ورلڈکپ جتوا کر کیریئر کا اختتام یادگار بنانے کا آخری موقع ہے۔
دوسری جانب ایمباپے ہیں جو 2018 ورلڈکپ میں بھی عمدہ کارکردگی دکھا چکے ہیں، مباپے ورلڈکپ ٹرافی کا کامیابی کے ساتھ دفاع کر کے برازیلین لیجنڈ پیلے کے نقش قدم پر ہیں۔
ایمباپے نے کلب کی سطح پر تو بہت سی کامیابیاں حاصل کی ہیں، اگر ورلڈکپ کی دو ٹرافیاں ان کے کھاتے میں آجائیں تو یہ دنیا کے بہترین کھلاڑی ہونے کے ساتھ یقیناً یہ منفرد اعزاز بھی اپنے نام کرسکتے ہیں۔
ارجنٹائن اور فرانس کے درمیان فٹبال ورلڈکپ کی تاریخ میں تین میچز کھیلے جاچکے ہیں، دو ارجنٹائن نے جیتے جبکہ ایک میں فرانس کامیاب رہی۔ فرانس نے گزشتہ ورلڈکپ کے پری کوارٹرفائنل میں ارجنٹائن کو 3 کے مقابلے میں 4 گول سے ہرایا تھا۔
