-
-
الیکشن کمیشن نے ایک مرتبہ پھر عوام سے اپیل کی ہے کہ ووٹرز فہرست میں نیا اندراج، اخراج ، تصحیح اور ردوبدل کرائی جاسکتی ہے۔ ووٹرز فہرست 28 ستمبر سے غیر منجمد ہے اور 25 اکتوبر 2023 تک غیر منجمد رہے گی ۔
الیکشن کمیشن کے مطابق 25 اکتوبر 2023 تک تمام اہل افراد جن کے پاس شناختی کارڈ موجود ہو وہ اپنے ووٹ کا اندراج کر سکتا ہے۔ اگر کوائف یا ایڈریس میں کوئی غلطی ہو وہ بھی درست کی جا سکتی ہے۔ واضح رہے کہ انتخابی فہرستوں کو ملک بھر میں 20 جولائی 2023 کو منجمد کردیا گیا تھا۔
الیکشن کمیشن کے مطابق قانون کے مطابق ووٹ کا اندراج ووٹر کے شناختی کارڈ کے مطابق مستقل یا موجودہ پتہ پر کیا جاتا ہے۔ تیسرے ایڈریس پر کسی ووٹ کا اندراج نہیں ہو سکتا۔ تاہم سرکاری ملازمین اگر کسی دوسرے ضلع یا صوبے میں تعینات ہیں تو اپنی پوسٹگ والی جگہ پر اپنا اور فیملی کا ووٹ درج کراسکتا ہے۔
الیکشن کمیشن کے مطابق 8 لاکھ سے زائد افراد جن کو نادرا کی طرف سے شناختی کارڈ جاری کئے گئے ہیں انکا ڈیٹا یکم اکتوبر 2023 کو نادرا سے حاصل کر لیا تھا جس کی ڈیٹا انٹری جاری ہے اور یہ تمام اہل افراد آئندہ عام انتخابات میں اپنا حق رائے دہی استعمال کر یں گے۔
الیکشن کمیشن کی جانب سے جاری بیان میں کہا گیا ہے کہ 25 اکتوبر 2023 ووٹ کے اندراج، اخراج اور درستگی کی آخری تاریخ ہے۔ ایسے تمام افراد جنہیں 25 اکتوبر 2023 تک شناختی کارڈ جاری ہوں انکے ووٹ کے اندراج کو یقینی بنایا جائے گا۔
پاکستان کے تمام اضلاع میں ڈسٹرکٹ الیکشن کمشنر بطور رجسٹریشن آفیسر تعینات ہیں اور ووٹ اندراج میں تمام افراد کو مکمل سہولت دی جارہی ہے۔ الیکشن کمیشن کے مطابق ووٹ کا اندراج اور منتقلی فارم 21 پر ہوتی ہے جو الیکشن کمیشن کی ویب سائٹ www.ecp.gov.pk پر موجود ہے اور ڈاؤن لوڈ کیا جا سکتا ہے۔
الیکشن کمیشن کا کہنا ہے کہ 25 اکتوبر 2023 کو ملک بھر میں تمام انتخابی فہرستوں کو منجمد کر دیا جائے گا جس کے بعد عام انتخابات تک کسی بھی ووٹ کا نہ ہی اندراج ہو سکے گا اور نہ ووٹ کی منتقلی یا ردو بدل ہوسکے گا۔
