-
-
امیرجماعت اسلامی کراچی حافظ نعیم الرحمان کا کہنا ہے کہ کراچی میں صرف دو دن بارش کی پیشگوئی ہے لیکن اسکو جواز بناکر ایک بار پھر شہر میں بلدیاتی انتخابات ملتوی کرنے کی سازش کی جارہی ہے۔
سندھ ہائی کورٹ کے باہر میڈیا سے گفتگو میں حافظ نعیم الرحمان کا کہنا تھا کہ انشاء اللہ 28 اگست کو ہی الیکشن ہوں گے، بلدیاتی انتخابات کو ملتوی کرنے کی سازش کو کامیاب نہیں ہونے دیں گے، انتخابات سے فرار چاہنے والوں کو بھاگنے نہیں دیں گے۔
امیر جماعت اسلامی نے کہا کہ کراچی میں دو دن کا اسپیل ہے، کوئی فرار چاہتا ہے تو کسی صورت قبول نہیں کریں گے، جن لوگوں کا بڑا بڑا مینڈیٹ ہے وہ کیوں نہیں بولتے کراچی کو شہری حکومت چاہیے۔
نعیم الرحمان نے کہا کہ کھڈے پڑے ہوئے ہیں لوگوں کا چلنا مشکل ہوگیا ہے، ہم ان کا پیچھا کریں گے اور چھوڑیں گے نہیں، ہارنا جیتنا مسئلہ نہیں مگر ہم کراچی کی آواز ہیں اور یہ آواز اٹھاتے رہیں گے۔
امیر جماعت اسلامی نے کہا کہ کراچی کے شہریوں پر کے الیکٹرک نے تباہی مچائی ہوئی ہے، فیول ایڈجسٹمنٹ کے نام پر اور اوور بلنگ پر 3 کروڑ شہریوں کو اذیت دے رہے ہیں۔
حافظ نعیم الرحمان نے کہا کہ ہم نے درخواست دائر کی ہے، 1سال کی لوٹ مار کا آڈٹ کیا جائے، دو دفعہ شیئرز فروخت ہوئے مگر دونوں دفعہ قانونی ضروریات کو پورا نہیں کیا گیا، ڈیڑھ سو یونٹس کا بل 3 ہزار کا بل تھا ان کا 7،8 ہزار بل آرہا ہے، چھوٹے کاروبار کرنے والے کہتے اب کاروبار نہیں کرسکتے۔
نعیم الرحمان نے کہا کہ اوریجنل بل کم ہوتا ہے چارجز کے نام پر ڈاکہ ڈالا جارہا ہے، نیپرا کیا کررہا ہے، کے الیکٹرک معاشی دہشت گردی کررہی ہے، خبر ہے سوئی گیس کی کے الیکٹرک 126 ارب کی نادہندہ ہے۔
انہوں نے کہا کہ مفتاح اسماعیل نے کہا کے الیکٹرک کو مفت بجلی مل رہی ہے، کوئی شہری دو چار دن بل ادا نہ کرے تو کنیکشن کاٹ دیا جاتا ہے، جہاں لوڈ شیڈنگ نہیں تھی وہاں بھی 12 گھنٹے بجلی جارہی ہے۔
