-
-
شہرقائد میں بجلی فراہم کرنے والے ادارے کے الیکٹرک کی شنگھائی الیکٹرک کو فروخت کرنے کے معاملے پر وزیر توانائی سندھ کا کہنا ہے کہ معاہدے سے پہلے سندھ حکومت کو بھی اعتماد میں لیا جائے۔
وزیرتوانائی سندھ امتیاز شیخ نے اپنے ایک بیان میں کہا ہے کہ وفاقی حکومت کی جانب سے کے الیکٹرک شنگھائی الیکٹرک کو فروخت کرنے کا معاملہ علم میں آیا ہے۔ وہ سندھ حکومت کی جانب سے شنگھائی الیکٹرک اور کے الیکٹرک کو متنبہ کرتے ہیں کہ کوئی بھی معاہدہ کرنے سے پہلے سندھ حکومت کو اعتماد میں لیا جائے ۔
انہوں نے کہا کہ ایسا کوئی معاہدہ قبول نہیں ہوگا جس میں سندھ حکومت کی نمائندگی شامل نہ ہو۔ وزیرتوانائی نے کہا سابق حکومت نے مذاکرات میں سندھ کا نمائندہ شامل کیا تھا۔
وفاق ہر معاملے کی طرح سندھ کو ایک مرتبہ پھر نظر انداز کر رہا ہے، ان کا مزید کہنا تھا کہ پی ٹی آئی حکومت من مانے فیصلے کر کے اداروں کی فروخت کے فیصلے کر رہی ہے۔
