-
-
وفاقی وزیرتوانائی خرم دستگیر کا کہنا ہے کہ کراچی کے شہریوں کے بجلی سے متعلق تحفظات دور کرنے کیلئے ہر ممکن اقدامات کئے جائیں گے۔ اس سلسلے میں وفاقی سطح پر بات کی جائے گی۔
گزشتہ روز وفاقی وزیرتوانائی نے کے الیکٹرک کے آفس میں انتظامیہ اور متحدہ قومی موومنٹ پاکستان کے رہنماؤں سے ملاقات کی جس میں کراچی میں بجلی کی ترسیل اور دیگر امور پر گفتگو ہوئی۔
کے ای انتظامیہ کے ساتھ اجلاس کے بعد میڈیا سے گفتگو کرتے ہوئے خرم دستگیر نے کہا کہ بجلی کی فراہمی اور اس کے ٹیرف سے متعلق کراچی کے شہریوں کے تحفظات پر وفاقی سطح پر بات کی جائے گی۔
خرم دستگیر کا کہنا تھا کہ کراچی کے شہریوں کو اس سلسلے میں ریلیف فراہم کرنے کے لیے ہر ممکن اقدامات کیے جائیں گے، حکومت بلوں کی عدم ادائیگی اور بجلی چوری کے مسئلے سے نمٹنے کے لیے اقدامات کر رہی ہے تاکہ بل ادا کرنے والے صارفین کو بجلی کی قلت کا سامنا نہ کرنا پڑے۔
