مویشیوں میں لمپی اسکن کی بیماری کے بعد کراچی میں بڑھتی ہوئی مرغی اور بکرے کے گوشت کی قیمتوں کو کنٹرول کرنے کیلئے کمشنر کراچی نے اہم فیصلہ کرلیا۔ کراچی میں مرغی اور بکرے کے گوشت کی قیمتیں مقرر کردی گئیں۔
کمشنر کراچی محمد اقبال میمن کی زیر صدارت قیمتوں کے تعین کے لئے ہونے والے اجلاس میں ڈپٹی کمشنرز ، بیورو آف پرائسز ، ، پاکستان پولٹری ایسوسی ایشن ، پولٹری ھول سیلر اور ریٹیلرز ایسوسی ایشن ، کنزیومرز رائٹس ایسوسی ایشن، میٹ مرچنٹ ایسوسی ایشن اور شیخ القریش ایسوسی کے علاوہ متعلقہ محکموں کے افسران نے شرکت کی۔
طویل مشاورت کے بعد گوشت کی قیمتیں مقرر کردی گئیں۔ زندہ مرغی کی قیمت 235 روپے اور مرغی کے گوشت کی قیمت 365 روپے فی کلو گرام مقرر کی گئی ہے۔ بکرے کا گوشت 1220 روپے فی کلو گرام میں فروخت کیا جائے گا۔
کراچی میں چکن فارمر کا ریٹ 220 روپے فی کلو ، چکن ہول سیلر کا 228 روپے فی کلو اور چکن ریٹیلر کا ریٹ زندہ مرغی 235 روپے اور مرغی کے گوشت کا ریٹ 365 روپے فی کلوگرام مقرر کیا گیا ہے۔
ڈپٹی کمشنرز اور بیورو آف پرائسز نے زندہ مرغی 221 روپے ، مرغی کا گوشت 340 روپے اور بکرے کے گوشت کی 1128 روپے فی کلو گرام کی سفارش کی تھی۔ کمشنر کراچی کا کہنا ہے کہ متعلقہ ایسوی ایشن سے طویل مشاورت کے بعد نئی قیمتیں مقرر کی گئی ہیں۔
چیئرمین کنزیومر ایسوسی ایشن آف پاکستان کوکب اقبال کا کہنا تھا کہ ڈپٹی کمشنرز اور بیورو آف پرائسز نے بہترین وررکنگ کی ہے، کمشنر کراچی محمد اقبال میمن نے بہترین روایت قائم کی ہے۔
کمشنر کراچی محمداقبال میمن نے مرغی اور بکرے کے گوشت کی مقرر قیمتوں پر سختی سے عمل درآمد کرانے کا حکم بھی دیا۔ محمداقبال میمن نے حکم دیا کہ ڈپٹی کمشنرز سختی کے ساتھ یقینی بنائیں کہ دکاندار نئی قیمتوں کی فہرست نمایاں جگہ پر آویزاں کریں۔
کمشنر کراچی کا کہنا تھا کہ ہمیں شہریوں کے حقوق کا تحفظ کرنا ہے ۔ کوئی دکاندار اگر زیادہ قیمت پر گوشت فروخت کرے تو شہری ہیلپ لائن نمبر 1299 یا کمشنر کراچی ویب سائٹ یا کمشنر کراچی فیس بک پیج پر شکایات درج کرسکتے ہیں۔
