-
-
چیف سیکریٹری سندھ ڈاکٹر سہیل راجپوت نے یکم جولائی سے کراچی میں سیف سٹی منصوبہ کے آغاز کی خوشخبری سنادی۔ چیف سیکریٹری سندھ کا کہنا ہے کہ سیف سٹی منصوبہ کے آغاز سے شہر میں سیکیورٹی کے مسائل کم ہوں گے۔
چیف سیکریٹری سندھ ڈاکٹر سہیل راجپوت نے کورنگی ایسوسی ایشن آف انڈسٹری میں تاجروں سے ملاقات کی۔ ڈاکٹرسہیل نے تاجروں کو یقین دلایا کہ شہر میں جرائم پر قابو پانے کیلئے اقدامات کئے جارہے ہیں۔
کراچی میں سیف سٹی کا منصوبہ تیار کرلیا ہے، یکم جولائی سے سیف سٹی پراجیکٹ کا آغاز ہوجائے گا۔ جس سے شہر میں سیکیورٹی مسائل پر قابو پانے میں مدد ملے گی۔
سیف سٹی منصوبے کے تحت کراچی کے تمام اضلاع میں مختلف مقامات پر 10 ہزار سے زائد سی سی ٹی وی کیمرے نصب کئے جائیں گے جبکہ کراچی پولیس اور شہری انتظامیہ کے پہلے سے موجود کیمرے بھی سیف سٹی پراجیکٹ میں شامل کئے جائیں گے۔
چیف سیکریٹری سندھ کا تاجروں سے کہنا تھا کہ انکی وزیراعظم شہباز شریف سے بات ہوئی ہے، غیرملکی درآمدات پر کو بند کرنے کا فیصلہ وقتی ہے، تمام امپورٹ بند نہیں کی جاسکتی۔
ڈاکٹر سہیل راجپوت کے مطابق مسائل کا حل ایکسپورٹ کو بڑھانا ہے۔ کراچی ملک کا سب سے بڑا ایکسپورٹ کرنے والا شہر ہے۔ کراچی کے ایکسپوٹرز کو بجلی ، پانی ، گیس اور دیگر مسائل درپیش ہیں۔
صوبائی اور وفاقی حکومت کو تاجروں کو درپیش مسائل کا علم ہے، انکے مسائل حل کرنے اور کاروبار کیلئے سازگار ماحول فراہم کرنے کیلئے کوشاں ہے۔
