کانرڈ رابرٹ ٹربل کو کراچی میں امریکی قونصل خانے میں قونصل جنرل تعینات کردیا گیا۔ کانرڈ رابرٹ ٹربل نے قونصل جنرل کی حیثیت سے ذمہ داریاں سنبھال لیں۔
کراچی میں امریکی قونصل جنرل کا عہدہ سنبھالنے اور پاکستان کے عوام کیساتھ دونوں ممالک کے درمیان سفارتی تعلقات کی 76 ویں سالگرہ مناتے ہوئے کانرڈ رابرٹ ٹربل نے اقتصادی سرمایہ کاری، تجارتی تعاون اور سبز اتحاد فریم ورک کے فروغ دینے کا عزم کیا۔
امریکی قونصل جنرل کا کہنا تھا کہ وہ امریکہ اور پاکستان کے درمیان دوطرفہ شراکت داری کو بڑھانے کے مشترکہ مقصد کو پروان چڑھانے میں اہم کردار ادا کریں گے، جس سے دونوں ممالک کو فائدہ ہوگا۔
کانرڈ رابرٹ ٹربل حال ہی میں امریکی مشن کے نائب سربراہ اور 2020ء تا 2023ء تک میڈرڈ اسپین میں ناظم الامور کے طور پر خدمات انجام دے چکے ہیں۔ میڈرڈ سے قبل انہوں نے واشنگٹن میں مغربی یورپ اور یورپی یونین کیلئے تین سال تک نائب معاون برائے وزارت خارجہ کی حیثیت سے کام کیا۔
وہ ایک سال تک فارن سروس انسٹی ٹیوٹ میں ڈپلومیٹک ٹریڈ کرافٹ ٹریننگ اسکول کے سربراہ رہے اور امریکہ کے فنڈ برائے جرمن مارشل میں ایک سال تک سینئر رکن کی حیثیت سے خدمات انجام دیں۔ انہیں کیوبا کے دارالخلافہ ہوانا میں 2012ء تا 2015ء امریکی مشن کے نائب سربراہ کے ذمیداریاں تفویض کی گئیں۔
کانرڈ رابرٹ ٹربل کا بچپن کیلیفورنیا کے شہرلاس اینجلس میں گزرا۔ کانرڈ ٹربل نے لویولا میری ماؤنٹ یونیورسٹی سے شعبہ تاریخ میں بیچلرز، جنوبی کیلیفورنیا یونیورسٹی سے بین الاقوامی تعلقات میں ماسٹر ز اور یو ایس نیشنل وار کالج سے قومی سلامتی کے مطالعہ میں ماسٹرز کی ڈگری حاصل کی ہے۔
کانرڈ ٹربل خارجہ امور کی خدمات میں شامل ہونے سے قبل، جرمنی میں طالب علم اور ہنڈوراس میں رضاکاراستاد تھے۔ انہیں ہسپانوی، جرمن، فرینچ اور ہیشنکریئول زبانوں پر عبور حاصل ہے۔ گلوکاری اور موسیقی سے چاہ رکھنے والے کانرڈ ٹربل نیشنل اکیڈمی آف ریکارڈنگ آرٹس اینڈ سائنسز(گریمی ایسوسی ایشن) کے سابق رکن بھی ہیں۔
وہ کھیلوں کے بھی بیحد شوقین ہیں اور کرکٹ کے داؤ پیچ سیکھنے میں دلچسپی رکھتے ہیں۔ جبکہ وہ بیس بال، باسکٹ بال اور ساکر کھیلوں کے منجھے ہوئے کھلاڑی بھی ہیں۔
