امیرجماعت اسلامی کراچی حافظ نعیم الرحمان نے بارش کے بعد کراچی کی ابتر صورتحال پر پیپلز پارٹی کو شدید تنقید کا نشانہ بنایا۔ حافظ نعیم نے پیپلز پارٹی کو بلدیاتی انتخابات میں عوام کے ردعمل سے خبردار رہنے کا مشورہ بھی دے دیا۔
حافظ نعیم الرحمٰن نے اپنی پریس کانفرنس کے دوران شہرِ قائد کراچی کی موجودہ صورتِ حال پر پی پی پر تنقید کرتے ہوئے کہا ہے کہ عید کا تیسرا دن ہے اور ہمارا شہر بے یارو مددگار ہے، آئی آئی چندریگر روڈ پر اس وقت بھی پانی موجود ہے۔
انھوں نے کہا کہ کراچی کے رہنے والے اب پیپلز پارٹی کو جان چکے ہیں۔ عوام اب بلدیاتی انتخابات میں ان کے خلاف اٹھ کھڑے ہوں گے۔ ایم کیو ایم ن لیگ اور پیپلز پارٹی کی اتحادی ہے۔ ایم کیوایم کا پورا زور اس پر ہے کہ سندھ میں انکا گورنر تعینات ہوجائے۔
حافظ نعیم نے کہا کہ عمران خان صاحب کے لوگوں نے بھی کراچی کے لیے کچھ نہیں کیا۔ مرتضٰی وہاب پہلے 66 کروڑ روہے کا حساب دیں۔ پرائیویٹ کمپنیاں مافیا بن چکی ہیں اس کے خلاف کیوں نہیں بولتے۔
انہوں نے کہا کہ 24 گھنٹے ہوگئے ہیں لیکن ابھی تک سڑکوں پر پانی ہی پانی ہے، کورنگی، نیو کراچی، اولڈ سٹی ایریا کا برا حال ہے، 1 اعشاریہ 2 ارب روپے نالوں کی صفائی کے لیے رکھے گئے تھے وہ کہاں ہیں؟ مرتضیٰ وہاب 66 کروڑ کا جواب دیں کہ وہ کہاں ہیں؟
حافظ نعیم نے کہا ہے کہ یہ آپس میں کھیلتے رہتے ہیں، کراچی کے لوگوں سے ان کا کوئی واسطہ نہیں۔ انہوں نے کہا کہ 14 سال سے برسرِ اقتدار پارٹی نے ہزاروں ارب روپے کا بجٹ استعمال کیا ہے، جس ادارے میں چلے جائیں تو صرف کرپشن کرپشن اور کرپشن ہے۔
حافظ نعیم الرحمٰن نے کہا ہے کہ اس وقت کراچی میں ہنگامی صورتِ حال ہے، جہاں تعینات 80 فیصد عملہ چھٹی منانے گیا ہوا ہے، کراچی کے لوگ ریٹائر ہوتے جا رہے ہیں نئے لوگ ہیں ہی نہیں۔
اُن کا مزید کہنا ہے کہ پیپلز پارٹی کے 90 فیصد بھرتی کیے گئے لوگ کراچی سے ہیں ہی نہیں، ہم لسانیت پر سیاست نہیں کرتے لیکن پیپلز پارٹی کو سوچنا چاہیے۔
