-
-
پاکستان سمیت دنیا بھر میں آج بچوں کا عالمی دن منایا جا رہا ہے، اس دن کو منانے کا مقصد بچوں کی عزّت افزائی، حوصلہ افزائی اور حقوق کی پاسداری کرنا ہے۔
ہر سال 20 نومبر کو بچوں کا عالمی دن منایا جاتا ہے، دور جدید میں بھی دنیا بھر میں بچوں کو گھریلو تشدد کا سامنا ہے، اس قسم کا سلوک بچوں کی نشوونما پر منفی اثرات مرتب کرتا ہے۔
اقوامِ متحدہ نے پہلی بار انٹرنیشنل چلڈرن ڈے منانے کا اعلان 20 نومبر 1954 میں کیا، اس دن کو منانے کا مقصد بچوں کی تعلیم و تربیت، معاشرتی ومذہبی تربیت سے متعلق شعور اُجاگر کرنا ہے تاکہ دنیا بھر کے بچے مستقبل میں اپنا مثبت کردار ادا کرسکیں۔
آج کے دور میں بھی دنیا بھر میں بچوں کو گھریلو تشدد کا سامنا ہے، اس قسم کا سلوک بچوں کی نشوونما پر منفی اثرات مرتب کرتا ہے۔
سماجی کارکن، مصنفہ اور موٹیویشنل اسپیکر، 16 سالہ تقویٰ احمد کو پاکستان میں یونیسف کی پہلی یوتھ ایڈووکیٹ مقرر کیا گیا ہے۔ پنجاب کے شہر گجرانوالہ سے تعلق رکھنے والی تقویٰ قیامِ امن شمولیت، معذور افراد کے حقوق اور تعلیم کے فروغ کے لیے کام کرتی ہیں۔
بچوں کے عالمی دن کے موقع پر ان کے تقررکا مقصد بچوں کو اپنے حقوق کے لیے آواز بلند کرنے اور مثبت تبدیلی کی کوششیں کرنے کی ترغیب دینا ہے۔
اس موقع پر تقویٰ احمد کا کہنا تھا، ’’میں یونیسف کی یوتھ ایڈووکیٹ بننے پر بے حد خوش ہوں۔ میرا مقصد نوجوانوں کے جذبات کی ترجمانی کرنا، ان کے حقوق کا تحفظ کرنا اور دوسروں کو بااختیار بنانا ہے۔
میں ایک ایسے مستقبل کا خواب دیکھتی ہوں، جہاں پاکستان کے ہر بچے کو اعلیٰ معیار کی تعلیم اور صحت کی سہولیات تک رسائی حاصل ہو، تاکہ وہ ایک محفوظ، سازگار اور مساوات پر مبنی ماحول میں پل بڑھ سکے۔‘‘
واضح رہے کہ بچوں کی تربیت میں والدین کا کردار اہمیت رکھتا ہے اسی لئے ماں کی گود کو بچے کی اوّلین درس گاہ کہا جاتا ہے، بچے پھولوں جیسے ہوتے ہیں اس لئے انکا خیال بھی پھولوں کی طرح ہی رکھنا چاہیے۔
