-
-
اٹھارویں صدی میں براعظم ہند میں میسور کے حکمران ٹیپو سلطان کی خواب گاہ سے ملنے والی تلوار نیلام کردی گئی۔ ٹیپوسلطان کی تلوار لندن میں 1 کروڑ 40 لاکھ پاؤنڈ میں نیلام ہوئی۔
برطانوی میڈیا فرسٹ پوسٹ کی رپورٹ کے مطابق نجی بین الاقوامی آکشن ہاؤس بونہامس نے تلوار کی فروخت کے انتظام کیے تھے، بیان میں کہا گیا کہ تلوار کا جتنا تخمینہ لگایا گیا اس سے 7 گنا زیادہ ہے۔
آکشن ہاؤس بونہامس نے ایک نجی میڈیا کو بتایا کہ تلوار کو خریدنے والے کی شناخت ظاہر نہیں کرسکتے کیونکہ یہ ہماری پرائیویسی پالیسی کے خلاف ہے۔
ٹیپو سلطان نے 18ویں صدی کے آخر میں کئی جنگوں میں فتح حاصل کی تھی، انہوں نے 1775 اور 1779 کے درمیان کئی مواقع پرمرہٹوں کے خلاف جنگ لڑی۔ انہوں نے کہا کہ یہ شاندار تلوار ٹیپو سلطان سے منسلک تمام ہتھیاروں میں سب سے عظیم الشان کہی جاتی ہے جو اب بھی کچھ لوگوں کے پاس موجود ہیں۔
آکشن ہاؤس بونہامس میں اسلامی اور انڈین آرٹ کے سربراہ اولیور وائٹ نے کہا کہ سلطان کی اس تلوار کے ساتھ ذاتی وابستگی، بے عیب خوبصورتی اور اس پر کی جانے والی شاندار کاریگری اسے منفرد اور انتہائی قیمتی و پُرکشش بناتی ہے۔ یہ تلوار ٹیپو سلطان کے محل کے نجی کوارٹر سے ملی تھی۔
