-
-
نگراں وزیراعلی سندھ جسٹس ریٹائرڈ مقبول باقر نے کراچی میں عائشہ منزل کے قریب آگ لگنے سے متاثرہ عرشی شاپنگ سینٹر کا دورہ کیا اور عمارت کا معائنہ کیا۔
وزیراعلی سندھ نے متاثرین کی رہائش کی درخواست پر عمارت کے رہائشی متاثرین کے لئے ریلیف کیمپ قائم کردیا۔ نگراں وزیراعلیٰ سندھ نے ڈی سی سینٹرل فواد سومرو کو ہدایت دی کہ ریلیف کیمپ کا بندوبست کر کے رپورٹ کریں۔
وزیراعلی سندھ کی ہدایت پر ڈی سی سینٹرل نے دو اسکولوں میں ریلیف کیمپ قائم کرنے کا بندوبست کر دیا۔ ترجمان وزیراعلی سندھ کے مطابق ریلیف کیمپوں میں پانی اور بجلی کی سہولیات بھی مہیا کر دی گئی ہیں۔
وزیراعلی سندھ کا میڈیا سے گفتگو کرتے ہوئے کہنا تھا کہ گزشتہ روز آگ لگنے کے واقعے پرافسوس ہے، انکوائری کے احکامات پہلے ہی جاری کر چکا ہوں ذمہ داروں کے خلاف سخت کارروائی ہوگی۔
وزیراعلی سندھ نے کہا کہ تمام متاثرین کو سہولت فراہم کریں گے، رہائشی عمارت کےمتاثرین کو قریبی شیلٹر میں منتقل اور سہولت دی جائیں گی۔
جسٹس ریٹائرڈ مقبول باقر نے کہا کہ عمارتوں میں فائرسیفٹی اور فائر روٹس کا انتظام ہونا چاہیے، انکوائری کا جو بھی نتیجہ آئے گا اس پر کاروائی کی جائے گی۔ عمارت کی بنیاد دیکھ کر گھروں میں جانے کی اجازت دیں گے۔ متاثرین کیلئے کھانے ، پینے کا انتظام کیا جارہا ہے ہم دیکھ رہے ہیں کیسے بہتری لائے جائے۔
