-
-
ورلڈکپ کیلئے پاکستانی کھلاڑیوں کو اب تک بھارتی ویزے جاری نہیں ہوسکے۔ پی سی بی نے کھلاڑیوں کے ویزوں کیلئے درخواستیں جمع کرا رکھی ہیں۔
میڈیا رپورٹس کے مطابق پاکستان کے ورلڈکپ اسکواڈ میں شامل کھلاڑیوں کے ویزے تاخیر کا شکار ہیں۔ کھلاڑیوں کے ویزوں کی درخواستیں جمع کرانے کے باوجود ویزے جاری نہیں ہوئے۔
پاکستان کرکٹ بورڈ نےانٹرنیشنل کرکٹ کونسل (آئی سی سی) کو مسئلے سے متعلق آگاہ کردیا اور اپنی پریشانی کا بھی بتادیا ہے۔ معاہدے کے مطابق بھارت نے بروقت ویزے جاری کرنے کا کہا تھا۔
پاکستان اسکواڈ اور فینز کے ویزوں کے حوالے سے نہیں بتایا گیا، پی سی بی ایک ہفتے سے بھارتی ہائی کمیشن سے رابطے میں ہے، ایک ہفتے سے ویزوں کے جلد اجرا کے حوالے سے کہا گیا لیکن ہفتے کے آخری روز بھی ویزوں کا اجرا نہ ہو سکا۔
ویزے جاری نہ ہونے کے باعث کھلاڑیوں کی روانگی بھی تاخیر کا شکار ہوگئی ہے۔ پاکستانی اسکواڈ کو بھارت روانگی سے قبل چند روز دبئی میں قیام کرنا تھا تاہم ویزے جاری نہ ہونے کے باعث اس پر عمل درآمد نہیں ہوسکا۔ ممکنہ طور پر قومی اسکواڈ بھی براہ راست بھارت پہنچے گا۔
پاکستانی اسکواڈ نے 26 ستمبر کو براستہ دبئی بھارت روانہ ہونا ہے اورپاکستان کا پہلا وارم اپ 29 ستمبر کو نیوزی لینڈ سے شیڈولڈ ہے۔ واضح رہے کہ کرکٹ ورلڈکپ کیلئے پاکستان کے اسکواڈ کا اعلان کردیا گیا ہے، بابراعظم کپتان اور شاداب خان نائب کپتان ہوں گے۔
