-
-
میئر کراچی مرتضیٰ وہاب نے کے ایم سی کے ریونیو جنریشن کیلئے اہم قدم اٹھاتے ہوئے کراچی میں کے ایم سی کی زمینوں سے لیز کی مد میں ریکوری کرنے کا فیصلہ کر لیا۔
میڈیا رپورٹس کے مطابق لانڈھی کیٹل کالونی سے لیز کی مد میں ریکوری کا آغاز کرنے کی تیاری کرلی گئی ہے۔ 752 ایکڑ پر محیط لانڈھی کیٹل کالونی میں مختلف کیٹیگری کے 619 پلاٹوں سے دو ارب روپے کی ریکوری کا تخمینہ لگایا گیا ہے۔
میئر کراچی کو کیٹل کالونی سے لیز کی مد میں متوقع دو ارب روپے آمدنی سے متعلق رپورٹ پیش کر دی گئی، مرتضیٰ وہاب کو ڈائریکٹر لینڈ صباء السلام نے بریفنگ دی، میئر کراچی نے محکمہ لینڈ کو کے ایم سی کی زمین کو ریگولرائز کرنے کا حکم جاری کر دیا۔
مرتضیٰ وہاب نے کہا کہ کے ایم سی کی 2009ء کی قرارداد کے مطابق فی گز 350 روپے ریکوری کے چالان جاری ہونا تھے، 14 سال بعد اب نئے ریٹس کا اطلاق ہو گا۔
میئر کراچی نے کہا کہ زمینوں کی لیز سے حاصل کردہ رقم شہر کی بہتری پر خرچ کی جائے گی، کے ایم سی کیٹل کالونی میں تمام تر بنیادی سہولیات 1955ء سے فراہم کر رہا ہے۔
