پاکستان مسلم لیگ نون نے سابق وزیرخزانہ اور سندھ کے سیکریٹری جنرل مفتاح اسماعیل کو عہدے سے فارغ کرنے کا فیصلہ کرلیا۔ صوبائی صدر شاہ محمد شاہ کو بھی عہدے سے ہٹائے جانے کا امکان ہے۔
میڈیا رپورٹس کے مطابق مسلم لیگ نون کی اعلیٰ قیادت نے ناقص کارکردگی والے عہدیداروں کے خلاف کارروائی کا فیصلہ کرلیا ہے۔ چیف آرگنائزر مریم نواز مسلم لیگ نون سندھ میں تنظیمی تبدیلیاں کرنے کیلئے متحرک ہوگئی ہیں۔
مسلم لیگ نون کی اعلٰی قیادت صوبائی صدر شاہ محمد شاہ اور جنرل سیکرٹری مفتاح اسماعیل کی کارکردگی مایوس کن رہی ہے، دونوں کو عہدوں سے ہٹا کر نئے لوگوں کو ذمہ داری دی جائے گی۔ رپورٹس کے مطابق مریم نواز نے فیصلہ کیا ہے کہ مفتاح اسماعیل کو پارٹی عہدے سے الگ کر کے آئندہ کوئی اہم ذمہ داری نہیں دی جائے گی۔
واضح رہے کہ مفتاح اسماعیل وزیر خزانہ کے عہدے سے ہٹائے جانے اور سلیمان شہباز کی جانب سے تنقید کے بعد پارٹی قیادت اور پالیسیوں سے اختلافات کا اظہار کھل کر چکے ہیں۔
