-
-
قومی کرکٹ ٹیم کے کپتان بابراعظم نے تصدیق کی ہے کہ فخرزمان بھارت کے خلاف میچ میں پلیئنگ الیون کا حصہ نہیں ہوں گے۔ فخرزمان کی انجری میں بہتری آئی ہے لیکن وہ مکمل فٹ نہیں ہیں بھارت کے خلاف میچ میں سلیکشن کیلئے دستیاب نہیں ہوں گے۔
میلبورن میں پریس کانفرنس کرتے ہوئے بابراعظم نے بتایا کہ بھارت کے خلاف میچ کیلئے بھرپور تیاری کی ہے۔ ہر کھلاڑی کیلئے الگ گیم پلان بنایا ہے۔ میچ میں اپنے پلانز کو عملی جامعہ پہنانے کی کوشش کریں گے۔
بابراعظم کا کہنا تھا کہ اہم میچ کیلئے پلیئنگ الیون سے متعلق سوچ لیا ہے لیکن حتمی فیصلہ میچ سے قبل پچ اور کنڈیشنز کو دیکھ کر کریں گے۔ موسم ہمارے ہاتھ میں نہیں ہے۔ جتنا بھی میچ ہوگا اسکے لئے تیار ہیں۔
شان مسعود سے متعلق بابراعظم کا کہنا ہے کہ شان کو کوئی خطرناک انجری نہیں ہوئی وہ مکمل فٹ ہیں انکے تمام ٹیسٹ بھی کلیئر آئے ہیں۔ شان مسعود بھارت کے خلاف میچ میں سلیکشن کیلئے دستیاب ہوں گے۔
ٹی ٹوئنٹی ورلڈکپ میں پاکستانی ٹیم اپنا پہلا میچ کل بھارت کے خلاف کھیلے گی۔ میچ میلبورن کے تاریخی کرکٹ اسٹیڈیم میں شیڈول ہے۔ میچ بارش سے متاثر ہونے کا بھی خدشہ ہے۔
