-
-
سندھ میں عالمی وباء کورونا وائرس سے بچاؤ کی ویکسین لگانے کا ہدف 100 فیصد پورا ہوگیا۔ سندھ یہ ہدف حاصل کرنے والا پہلا صوبہ ہے۔
محکمہ صحت سندھ کے پروجیکٹ ڈائریکٹر ڈاکٹر ارشاد میمن کا کہنا ہے کہ صوبے میں 12 سال اور اس سے زائد کے 3 کروڑ 40 لاکھ 90 ہزار افراد کو مکمل طور پر ویکسین لگائی جاچکی ہے۔ ، تمام افراد کورونا وائرس کے خلاف ویکسین کی دو خوراکیں حاصل کرچکے ہیں۔
محکمہ صحت سندھ سے جاری ہونے والے اعلامیے کے مطابق سندھ کے مقابلے میں پنجاب میں نسبتاً کم یعنی 86 فیصد جبکہ خیبر پختونخوا میں 64 فیصد افراد کو مکمل ویکسین لگائی گئی ہے۔
سندھ میں ویکسی نیشن کی اعداد و شمار ظاہر کرتے ہوئے صوبائی حکومت کا کہنا ہے کہ صوبے بھر میں 75 لاکھ 50 ہزار افراد اضافی بوسٹر شارٹ بھی لگوا چکے ہیں۔
اعلامیے میں مزید کہا گیا کہ کورونا وائرس اب بھی ختم نہیں ہوا ہے اس کے نئے ویرینٹ مسلسل سامنے آرہے ہیں، شہری ایس او پیز پر عمل درآمد کرتے ہوئے ہر پانچ ماہ میں کورونا وائرس کے خلاف بوسٹر ویکسین لگوائیں۔
انہوں نے کہا کہ کورونا وائرس کے خطرناک مرض سے بچاؤ کے لیے ویکسین ایک محفوظ ذریعہ ہے اور سرکاری ادارے شہریوں کی صحت کے پیشِ نظر مفت ویکسین لگوا رہے ہیں۔
