-
-
الیکشن کمیشن آف پاکستان نے صدر مملکت ڈاکٹر عارف علوی کے بیان پر الیکشن ملتوی ہونے کے تاثر کو مسترد کرتے ہوئے کہا ہے کہ الیکشن ملتوی ہونے کا کوئی امکان نہیں ہے۔
الیکشن کمیشن آف پاکستان کی جانب سے جاری اعلامئے میں کہا گیا ہے کہ صدر مملکت نے بدھ کو ایک نجی ٹی وی چینل کو انٹرویو دیا جسکے دوران الیکشن پر صدر کے بیان کی وجہ سے یہ تاثر گیا ہے کہ شاید الیکشن ملتوی ہوجائیں۔
الیکشن کمیشن آف پاکستان کے ترجمان کا کہنا ہے کہ الیکشن کمیشن اس تاثر کو زائل کرنے کے لئے اسکی پرزور تردید کرتا ہے کہ الیکشن ملتوی ہونے کا کوئی امکان ہے۔
الیکشن کمیشن کے مطابق اس سلسلے میں ادارہ پہلے ہی اپنی پوزیشن واضح کرچکا ہے کہ حلقہ بندی کا پہلا مرحلہ مکمل ہو چکا ہے اور اعتراضات دائر کرنے کا دوسرا مرحلہ کل یعنی 27اکتوبر 2023 کو مکمل ہو جائے گا۔
اس کے ساتھ ہی ابتدائی حلقہ بندی پر اعتراضات کی سماعت الیکشن کمیشن 30 یا 31 اکتوبر سے شروع کرے گا اور30نومبر 2023 کو الیکشن کمیشن حلقہ بندیوں کی حتمی فہرست شائع کر دے گا۔
الیکشن کے انعقاد کے لئے ایکشن پلان کے مطابق الیکشن کمیشن کی تمام تیاریاں مکمل ہیں اور حلقہ بندی کی حتمی اشاعت کے بعد انتخابات کے شیڈول کا اعلان کر دیا جائے گا۔ اس میں کسی قسم کا ابہام نہیں۔
