پاکستان پیپلز پارٹی کے چیئرمین بلاول بھٹو زرداری کا کہنا ہے کہ کراچی میں بہت مشکل سے امن قائم کیا۔ شہر کے امن اور ترقی پر کوئی آنچ نہیں آنے دیں گے۔
بلاول بھٹو زرداری نے کراچی کے علاقے کھارادر میں دھماکے کی مذمت کرتے ہوئے کہا کہ دھماکے میں جانی نقصان پر افسوس ہوا ہے۔ وفاقی وزیرخارجہ نے دھماکے میں زخمی ہونے والے شہریوں کی جلد صحتیابی کیلئے دعا بھی کی۔
بلاول بھٹو زرداری نے کہا کہ یقین ہے، پولیس اور دیگر ادارے مل کر مجرموں کو بہت جلد از جلد قانون کی گرفت میں لائیں گے۔
انہوں نے کہا کہ دہشتگردی کسی بھی نام اور شکل میں ہو، انسانیت کی دشمن ہے، شہریوں کو یقین دلاتا ہوں کہ کراچی کے امن و ترقی پر کوئی آنچ آنے نہیں دیں گے۔
واضح رہے کہ گزشتہ رات کراچی کی مصروف ترین شاہراہ ایم اے جناح روڈ پر واقع میمن مسجد کے نزدیک واقع گودام میں دھماکے کے نتیجے میں ایک خاتون جاں بحق جب کہ 11 افراد زخمی ہوگئے۔ دھماکے کی وجہ سےایک پولیس موبائل، متعدد موٹرسائیکلیں اور گاڑیوں کو بھی نقصان پہنچا۔
