سعودی عرب میں رمضان المبارک کے دوران مساجد میں افطار کرانے پر پابندی عائد کردی گئی۔ نمازوں اور دیگر سرگرمیوں کو ریکارڈ کرنے یا نشر کرنے کیلئے کیمروں کے استعمال پر بھی پابندی لگادی گئی ہے۔
جیو نیوز کی رپورٹ کے مطابق سعودی عرب کی وزارت برائے امور اسلامی و رابطہ کا کہنا ہے کہ رمضان المبارک میں مساجد میں افطار پر پابندی کا مقصد مساجد میں صفائی ستھرائی کو یقنی بنانا ہے۔
سعودی عرب کی وزارت برائے امور اسلامی و رابطہ کے مطابق مساجد میں پابندی ہے البتہ مساجد کے باہر مختص کردہ مقامات پر افطار کروائی جاسکے گی۔
سعودی وزارت برائے امور اسلامی نے مساجد کے لیے خصوصی ہدایات جاری کرتے ہوئے پابندی عائد کی ہے کہ آئمہ مساجد رمضان المبارک میں لوگوں کو افطار کروانے کے لیے کسی قسم کے عطیات قبول نہیں کریں گے۔
اسکے علاوہ مساجد میں نمازوں اور دیگر سرگرمیوں کو ریکارڈ کرنے یا نشر کرنے کے لیے کیمروں کے استعمال پر بھی پابندی لگائی گئی ہے۔
سعودی وزارت برائے امور اسلامی نے آئمہ مساجد کو ترغیب دی ہے کہ وہ رمضان کے دوران نماز تراویح کو طویل کرنے سے گریز کریں اور عوام کو روزوں اور ان کے فوائد کے بارے میں عملی معلومات فراہم کریں۔
