-
-
پاکستان کے نوجوان اور باصلاحیت بلے باز سعود شکیل نے سری لنکا کے خلاف کولمبو ٹیسٹ میں عالمی اعزاز اپنے نام کرلیا۔ سعود شکیل نے ٹیسٹ کیرئیر کے ابتدائی تمام 7 میچز میں نصف سینچری کرنے کا ریکارڈ بنایا۔
سعود شکیل نے سری لنکا کے خلاف کولمبو ٹیسٹ کی پہلی اننگز میں نصف سینچری کی اور اسکے ساتھ ہی سعود شکیل ٹیسٹ کیرئیر کے ابتدائی تمام 7 میچز میں نصف سینچری کرنے والے دنیا کے پہلے کرکٹر بن گئے۔
سعود شکیل نے یہ ریکارڈ قائم کرکے سنیل گواسکر، سعید احمد ، برٹ سٹکلیف اور باسل بچر کو پیچھے چھوڑا، جنہوں نے ابتدائی 6 میچز میں یہ کارنامہ انجام دیا تھا۔ سعود شکیل 57 رنز کی اننگز کھیل کر پویلین لوٹے۔
اس سے قبل سعود شکیل نے سری لنکا کے خلاف پہلے ٹیسٹ میں ڈبل سینچری اسکور کی تھی اور 208 رنز کی ناقابل شکست اننگز کھیلی تھی۔
سعود شکیل نے گزشتہ برس انگلینڈ کے خلاف ڈیبیو کیا تھا اور اپنے پہلے ہی ٹیسٹ میچ میں 76 رنز بنائے تھے۔ انگلینڈ کے خلاف ملتان میں کھیلے گئے دوسرے ٹیسٹ کی دونوں اننگز میں سعود شکیل نصف سینچری کرنے میں کامیاب ہوئی تھے۔ انکی اننگز بالترتیب 63 اور 94 رنز کی تھیں۔
انگلینڈ کے خلاف کراچی ٹیسٹ میں بھی سعود شکیل نے 53 رنزبنائے تھے جسکے بعد نیوزی لینڈ کے خلاف ٹیسٹ سیریز کے کراچی میں کھیلے گئے پہلے میچ میں بھی سعود شکیل نے 55 رنز بنائے جبکہ دوسرے ٹیسٹ میں 125 رنزبنائے تھے۔
