ملکی قرضہ تاریخ کی بلندترین سطح پر پہنچ گیا، اسٹیٹ بینک نے اعدادوشمار جاری کردئے

اسٹیٹ بینک آف پاکستان نے اگست 2024 تک وفاقی حکومت کےقرضوں کا اعداد وشمار جاری کردیا ہے۔

اسٹیٹ بینک کے مطابق وفاقی حکومت کے قرضے ملکی تاریخ کی بلند ترین سطح 70 ہزار 362 ارب روپے پر پہنچ گئے ہیں۔ رواں مالی سال کے پہلے 2 ماہ میں وفاقی حکومت کا قرض1448 ارب روپے بڑھا۔ اگست کے ایک مہینے میں مرکزی حکومت کے قرضے میں 739 ارب روپے کا اضافہ ریکارڈ ہوا۔

اسٹیٹ بینک کی دستاویز کے مطابق ستمبر 2023 سے اگست 2024 کے ایک سال میں وفاقی حکومت کا قرضہ 6 ہزار 392 ارب روپے بڑھا- اگست 2024 کے ایک سال میں وفاقی حکومت کے قرضوں کا حجم 70 ہزار 362 ارب روپے رہا-

دستاویزمیں بتایا گیا کہ اگست 2024 تک مرکزی حکومت کا مقامی قرضہ 48 ہزار 339 ارب روپے تھا۔ وفاقی حکومت کا بیرونی قرضہ اگست 2024 تک 22 ہزار 23 ارب روپے تھا-