وفاقی حکومت کی جانب سے 5 سالہ نجکاری پلان جاری کردیا گیا ہے یہ پلان 2024ء سے 2029ء تک کے لیے ہوگا،
میڈیا رپورٹ کے مطابق دستاویز میں بتایا گیا ہے کہ پلان کے تحت 3 مراحل میں 24 اداروں کی نجکاری ہو گی، پہلے مرحلے میں 1 سال میں 10 اداروں کی نجکاری کا پلان ہے۔ دوسرے مرحلے میں 1 سے 3 سال میں 13 اداروں کی نجکاری ہو گی جبکہ تیسرے مرحلے میں 3 سے 5 سال میں 1 ادارے کی نجکاری کرنے کا پلان بنایا گیا ہے۔
دستاویز میں کہا گیا ہے کہ پہلے مرحلے میں پی آئی اے اور روز ویلٹ ہوٹل نیویارک کی نجکاری کی جائے گی، پلان کے تحت زرعی ترقیاتی بینک اور فرسٹ ویمن بینک کی نجکاری بھی پہلے مرحلے میں ہو گی۔
ہاؤس بلڈنگ فنانس کارپوریشن کا نجکاری کا عمل بھی پہلے مرحلے میں مکمل کیا جائے گا جبکہ پہلے مرحلے میں پاکستان انجینئرنگ کمپنی اور سندھ انجینئرنگ لمیٹڈ کی نجکاری بھی ہو گی، فیصل آباد اور گوجرانوالہ بجلی کمپنیوں کی نجکاری بھی پہلے مرحلے میں شامل ہو گی۔
یوٹیلیٹی اسٹورز کارپوریشن کا نجکاری کا عمل دوسرے مرحلے میں مکمل کیا جائے گا جبکہ دوسرے مرحلے میں بجلی تقسیم کار کمپنیوں لیسکو، میپکو، حیسکو اور سیپکو کی نجکاری ہو گی۔
دستاویز کے مطابق پشاور اور ہزارہ الیکٹرک سپلائی کمپنیوں کی نجکاری، جام شورو پاور کمپنی اور سینٹرل پاور جنریشن کمپنی کی نجکاری بھی دوسرے مرحلے میں ہو گی۔ اس کے علاوہ ناردرن پاور جنریشن اور لاکھڑا پاور جنریشن کمپنی کی نجکاری، اسٹیٹ لائف انشورنس اور پاکستان ری انشورنس کمپنی کی نجکاری بھی دوسرے مرحلے میں ہو گی۔
دستاویز میں مزید گہا گیا کہ تیسرے مرحلے میں پوسٹل لائف انشورنس کمپنی کی نجکاری کا عمل مکمل کیا جائے گا
