کورنگی میں بہن پر تشدد کرنے پر سالے نے ڈنڈے برسا کر بہنوئی کو قتل کردیا، پولیس

بہن پر تشدد کرنے پر سالے نے ڈنڈے برسا کر اپنے بہنوئی کو جان سے مار دیا۔ پولیس کے مطابق کورنگی سنگر چورنگی کے قریب جھگڑے کے دوران سالے نے ڈنڈوں کے وار سے بہنوئی کو قتل اور اس کے بھائی کو زخمی کر دیا، جس کے بعد پولیس نے قاتل کو گرفتار کرلیا۔

شرافی گوٹھ کے علاقے کورنگی سنگر چورنگی رکشا اسٹینڈ کے قریب جھگڑے کے دوران ڈنڈوں کے وار سے ایک شخص جاں بحق اور ایک زخمی ہوگیا۔ متوفی کی لاش اور زخمی کو جناح اسپتال منتقل کیا گیا، جہاں جاں بحق شخص کی شناخت 24 سالہ شریف ولد دوست علی اور زخمی کی 25 سالہ سلیم ولد دوست علی کے نام سے کی گئی۔

مزید پڑھیں:کراچی میں ڈکیتی مزاحمت پر 8 سالہ بیٹے کے سامنے باپ کا قتل

پولیس کے مطابق جاں بحق و زخمی ہونے والے دونوں بھائی ہیں، ملزم حبیب اللہ کو گرفتار کر لیا گیا ہے، جس نے پولیس کو بتایا کہ مقتول شریف اس کا بہنوئی ہے، مقتول نے اس کی بہن کو مارا پیٹا تھا، جس پر طیش میں آکر اس نے ڈنڈوں کے وار کر کے اسے قتل کردیا۔ حکام کے مطابق مقتول اور ملزم دونوں رکشہ ڈرائیور ہیں اور اسی علاقے کے رہائشی ہیں واقعے کی مزید تفتیش شروع کردی گئی ہے۔

Web Desk