پاکستانی ایئرپورٹس پر سیکیورٹی کے حوالے سے جاپان کے ساتھ اہم معاہدہ ہو گیا ہے۔
پاکستان ایئرپورٹس اتھارٹی (پی اے اے) کے مطابق ملکی ایئرپورٹس پر ایوی ایشن سیکیورٹی کے جدید آلات کی تنصیب کی جا رہی ہے، اس کے تحت ملتان اور فیصل آباد ایئرپورٹس پر جدید (ای ڈی ایس-سی ٹی) سیکیورٹی اسکینرز نصب ہوں گے۔
پی اے اے کے مطابق مذکورہ ایئرپورٹس پر جائیکا منصوبے کے تحت جدید بیگیج ہینڈلنگ سسٹم کی تنصیب بھی ہوگی، جدید سیکیورٹی سکینرز کی مدد سے آتشی مواد کی نشان دہی ممکن ہوگی۔
حکام کے مطابق جائیکا (جاپان) فیز-2 منصوبے کے تحت سیکیورٹی آلات کی کامیاب ٹینڈرنگ مکمل ہو چکی ہے، ٹینڈرنگ اور کنٹریکٹ کی تقریب میں پاکستان ایئرپورٹس اتھارٹی کے وفد نے شرکت کی، 4 ارب روپے سے زائد کا معاہدہ ٹیک انٹرنیشنل کمپنی کے ساتھ ٹوکیو میں طے پایا۔ پاکستان ایئرپورٹس اتھارٹی کے مطابق یہ منصوبہ جاپانی گرانٹ سے مکمل کیا جا رہا ہے۔
